I-Bayad Center gilusad sa Philpost

CEBU, Philippines - Gilusad sa Philippine Postal Corporation (PhilPost) ang proyekto nga I-Bayad Center   aron mapagaan    ang pagbayad sa mga kabus sa ilang obligasyon   ngadto sa nagkalain-laing industriya nga moalagad sa mga batakang serbisyo   kanila.

Matud pa ni Benito Quiros, Director for Operations sa Philpost, Central ug Eastern Visayas Area nga pinaagi sa   I-Bayad Center sa Philpost, ang mga may bayranan sa electric bill, water bill, PhilHealth, ug Social Security System, mahimong anha na ipaagi kanila.

Kining maong pangalagad sa Philpost gihimong libre ngadto  sa publiko sanglit ang memorandum of understganding (MOU) anaa   ra man sa maong ahensya ug sa ahensya kansang mga kliyente ilang gialagaran, matud pa ni Quiros.

Si Quiros kinsa maoy representante sa Philpost atol sa   senemanang forum sa Association of Government Information Officers (AGIO Forum) didto sa opisina sa Philippine Information Agency (PIA) Cebu nga nahimutang sa Gorordo Avenue ning dakbayan kagahapon nagkanayon nga ang proyekto nga I-Bayad Center   sa Philpost gitumong aron nga makatabang sila sa pagpagaan sa kolektahunon sa mga industriya nga nangalagad sa publiko ug sa katawhan mismo nga gialagaran niini.

Kini tungod kay kadtong may mga bayranan sa VECO, MCWD, PhilHealth ug SSS kansang pinuy-anan layo ra sa mga buhatan niining maong mga ahensya nga nahisgotan anha naman moderetso sa Philpost tungod kay anaa man kini mga buhatan o opisina sa kalungsoran ug mga dakbayan, dugang pa ni Quiros.

Giangkon usab ni Quiros nga bisan kun apektado na ang ilang kinitaan gumikan sa pagkibra sa mga suwat nga ipaagi sa koreo sukad muabot dinhi sa nasud ang mga modernong kahimanan sama   sa cellular phone, apan pinaagi sa pagsagop niining mga proyekto  sama sa I-Bayad Center, nakahatag lang gihapon kini og dugang kinitaan sa maong ahensya sa mga suwat.

Matud pa ni Quiros nga isip ahensya nga kolektor sa mga bayad alang sa elektrisidad, tubig, SSS, ug PhilHealth, mokita gihapon og  komisyon niini ang Philpost gikan sa nahisgutang mga industriya.

Midugang siya nga sa pagkakaron ang mga Sentro sa Philpost nga mialagad niining I-Bayad Center, mao ang Cebu Central Post Office, Mandaue Central Post Office, Talisay City Post Office ug Lapulapu City Post Office.(Liezl M. Frasno-Correspondent/WC) (BANAT NEWS)