Retired Major gipatay

CEBU, Philippines - Patay nang napalgan ang kanhi opisyal ug sakop sa Bureau of Jail Management and Penology (BJMP) human kini gipusil pasado alas-11 sa udto kagahapon diha sa ilang pinuy-anan sa Macroville dalan Gorordo barangay Lahug.

Ang biktima nailhan nga si Simplecio Niñeza, 65, usa ka retiradong Major sa Bureau of Jail Management and Penology (BJMP). Giimbestigar karon ang iyang anak nga si Glenn kinsa giingong maoy nakit-ang migawas sa balay sa biktima human sa butobuto sa armas.

Sa pakighinabi sa mga tigbalita sa hepe sa Homicide Section sa Cebu City Police Office, Chief Inspector Jul Mohammad Jamiri, misaysay kini nga aduna sila’y mga nakuhang mga impormasyon nga nagtumbok ni Glenn nga maoy responsable sa maong insidenti.

Matud pa ni Jamiri nga adunay saksing mibutyag nga sa wala pa mahitabo ang insidente gikatahong nangayo sa biktima og kwarta si Glenn apan naglalis ang duha ug misunod dayon ang butobuto sa armas. Naglunang sa kaugalingong dugo si Niñeza dihang napalgan. Butyag usab ni Jamiri nga ilang giimbitar ang anak sa biktima kini tungod kay adunay nakatudlo nga nakit-an kining migawas sa balay pagkahuman sa butobuto.

Laing impormasyon nga nakuha ni Jamiri mao nga ang biktima kapila na mahiubos kang Glenn tungod kay giingong nagbisyo kini og illegal drugs ug gikatahong magsige og pangayo og kwarta sa biktima.

Gibutyag ni Jamiri nga dihang ilang gikahinabi si Glenn wala kini mahimutang nga nakapaduda kanila.

“Among nakita sa iyahang reaksyon, reaksyon sa usa ka suspek ug dili reaksyon sa usa ka anak nga nawad-an og amahan,” matud pa ni Jamiri.

Gawas kang Glenn gisusi usab sa kapolisan ang posibilidad nga dunay laing suspek nga maoy mihimo sa krimen. Sa pakighinabi usab sa mga tigbalita sa anak niining si Glenn mihimakak kini sa iyang kalabotan sa maong insidente ug kini nangangkong imposibleng siya’y mopatay sa iyang amahan kay wala siya diha sa ilang balay atol sa pagkahitabo.

Matud pa niya didto siya nagpundo sa balay sa iyang uyab atol sa pagkahitabo.

Giangkon hinuon ni Glenn nga aduna sila’y ginamay’ng panaglalis sa iyang amahan apan usa lang kadto ka panaglalis sa amahan ug anak.

Gitahan usab ni Glenn ang iyang kaugalingon aron magpaubos sa paraffin test aron ipamatuod nga dili siya maoy responsable sa pagkamatay sa iyang amahan.

Butyag usab ni Glenn nga daghang makasulti nga wala siya dihang gipusil ang iyang amahan. Nakuha sa crime scene ang pito ka kabhang sa kalibre .45 nga bala ug duha ka slugs niini.

Gibutyag usab ni Jamiri nga duna sila’y nadawat nga report nga misuway og baligya si Glenn og kalibre .45 nga armas ug karon usa sa ilang giimbestigar.

Ang panimalay sa biktima diin mahitabo ang krimen malabay ra og bato gikan sa paril sa CCPO.

Ang biktima naigo sa iyang mata, abaga ug tulo ka igo sa dughan nga maoy hinungdan sa hinanali niining kamatayon.

Sa laing bahin, patay na nga napalgan ang usa ka lalaki human gipusil sa duha ka wala mailhing tawo pasado alas-9 sa miaging gabii diha sa dalan Panes Simpark sa barangay Banilad ning dakbayan.

Ang biktima nailhan nga si Diosdado Buenavista Jr. kinsa nakaangkon og samad pinusilan sa iyang ulo.

Giingong nagbarog ra kini daplin sa karsada dihang adunay duha ka wala mailhing tawo nga kalit mibutho ug gipusil ang biktima.

Nakuha gikan sa bulsa sa biktima mao ang usa ka disposable lighter ug usa ka syringe. Gisusi karun sa kapolisan ang motibo sa krimen. (Lesley Caminade-Vestil/EIM) (BANAT NEWS)