CEBU, Philippines - Dugang mga opisyal sa lungsod nga nanumpa nga magpasakop sa One Cebu Party mao ang taga Oslob.
Gipangunahan ni Mayor Ronald Guaren ang mga konsehal sa maong lungsod sa pagpanumpa nga gidumala ni Governor Gwendolyn Garcia.
Gawas kang Guaren ug mga konsehal sa maong lungsod, mikuyog usab ang mga opisyal sa 21 ka mga barangay sa maong lungsod, uban ang 2,500 ka mga pangulo sa panimalay, tanod, women’s group, senior citizens chapter leader, barangay health worker, day care worker ug uban pang sector kinsa andam nga mobuhis sa ilang kinabuhi alang sa One Cebu.
Si Guaren nagpasalamat sa katawhan sa Oslob kansang kasingkasing maunongon kaniya pinaagi sa pagpasakop sa One Cebu.
Gisaysay niya ang kadaghang mga proyekto nga gibubo sa ilang lungsod pinaagi ni Gobernador Garcia ug sa amahan niini nga si Kongresista Pablo Garcia nga maoy nagtukmod kanila nga suportahan ang mga Garcia sa One Cebu aron labi pang molipang ang mga mehoras sa ilang lungsod.
Human sa maong panumpa giawhag sa gobernador ang taga Oslob nga mopilit sa One Cebu aron pabahaan niya kini og dugang pang mga proyekto human sa eleksyon.
( /WC) (BANAT NEWS)