Nag-away kay himamaye

CEBU, Philippines - Matud ni PO2 Benjamen Gerozaga sa Argao Police Station dihang nahinabi sa Banat News ang magtiayon nadunggan nilang nag-away tungod sa kadagko na sa mga tingog, giingong himamaye ang lalaki ug nangabubho ang babaye.

Gikatahong mikuha og sundang ug gabas ang inahan sa bata aron hadlukon ang biktima nga dili makapanapat niya tungod kay giingong hingulata kini, apan nakakuha og kahoy ang biktima ug gipusposan sa agtang ang kapuyo ug natumba.

Dugang pa ni Gerozaga giilog sa biktima ang sundang ug gabas ug giyak-an ang kapuyo ug gigabas ang tuong paa niini.

Ang 11-anyos nga dalagita nga diha ra sa taliwala sa away sa mga ginikanan sa kahadlok sa mahitabo sa iyang inahan sa gibuhat sa iyang amahan daling mikuha og kutsilyo nga kapin dose pulgadas ang gitas-on ug gidagan ang amahan dayung dunggab niini sa dughan.

Ang biktima nakahimo pa kini og ibot sa kutsilyo nga nagtaroy sa dughan dayung dagan paingon sa gawas ug matud pa mibahad pa sa kapuyo ug mga anak nga magbantay kay balikon.

Tungod sa ilang kahadlok, ang dalagita ug duha ka igsuon ug sa ilang inahan nangayo dayun og tabang sa mga silingan kinsa maoy mitawag sa mga polis.

Napatay diay

Ang mga polis daling misubay sa nakit-ang patak- patak sa dugo diha sa lugar ug pag-abot nila sa kasagbutan nga bahin usa ka gatus ka metros gikan sa balay sa maong banay nakit-an ang patay’ng lawas sa biktima nga nagbuy-od nga nagkadugo.

Matud ni Insp. Alejandro Batobalonos dihang nahinabi sa Banat News kagahapon sa kaadlawon ang suspek uban sa iyang duha ka mga igsuong babaye ug inahan gi-turnover nila sa social welfare sa lungsod.

Kagahapong adlawa gitugyan na sa Department of Social Welfare and Development -7 ang suspek tungod kay menor de edad pa kini ug dili mahimong mapasakaan og kaso ubos sa balaod ug paabuton nalang ang rekomendasyon sa DSWD-7.

Gibiyaan ang pamilya

Dugang nahipos nga impormasiyon sa kapulisan ang biktima kanhi drayber sa usa ka ahensya sa gobiyerno apan gitaktak tungod gihapon sa bisyo sa pagpamabaye.

Nahimo usab kining drayber kaniadto ni Argao Mayor Edsel Galeos sa iyang construction firm apan gitaktak usab dili pa kaayo dugay human masakpi nga nakig-relasyon og asawa sa iyang kaubang drayber.

Nasayran nga gibiyaan na niini ang pamilya ug nakig-ipon na sa laing babaye diha sa sitio Looc sa barangay Poblacion sa lungsod sa Argao.

Buotang bata

Apan ang magtutudlo sa suspek nga si Maria Fe Caiwan dili katoong nahimo kini sa iyang tinun-an tungod kay kini “mahinhin” kaayo sa klase ug buotan kini sa iyang mga classmates. Mitug-an si Caiwan nga gisuginlan siya sa bata sa problema niini sa ilang pagpuyo tungod sa dili na maayong relasyon sa ilang mga ginikanan.

Gani niadtong Biyernes malipayon pa kaayo ang bata nga gihatagan siya og P20 sa amahan dihang nagkita sila sa merkado. Bisan ang suod nga higala sa dalagita nga 12-anyos nga gikahinabi usab sa Banat News mibutyag nga kanunay siya niining suginlan sa nahitabo sa ilang banay.

Ang inahan sa bata kinsa nakaangkon og bun-og mibutyag sa mga tigbalita nga murag wala na makaagwanta ang iyang anak sa binuhatan sa amahan kaniya.

Atol sa pagkahitabo hubog ang biktima pag-abot sa ilaha ug silang duha nagkalalis, buot unta niyang buslotan ang ligid sa motor sa biktima aron dili makalakaw apan gibunalan siya og kahoy niini.  Nakuha sa kapolisan diha sa crime scene ang usa ka gabas, usa ka sundang ug ang plamingkong giingong maoy gidunggab sa bata sa amahan ug ang notebook sa bata nga may gisuwat nga grabeng kasuko ngadto sa amahan ug ang suwat nga kini miangkong iyang gidunggab ang papa. (/EIM) (BANATNEWS)