CEBU, Philippines - Namatay ang usa ka security guard human kini lubaa sa laing gwardiya gamit ang plamingko sa miaging buntag duol sa satellite market sa barangay Dumlog, dakbayan sa Talisay.
Ang biktima mao si Bryan Leona, 22, stay-in guard sa Geo-Construction nga nahimutang sa maong barangay kinsa nasabak sa tiyan
Samtang ang suspetsado mao si Judie Daquiado, 38, residente sa nahisgutang barangay, kanhi gwardiya ubos sa E and R Security Agency.
Human sa hitabo si Daquiado gisuwayan og sikop ni Bonifacio Panon, barangay tanod sa Dumlog, apan mikisi-kisi kini busa naglinayogay sila hangtud nga nasikop ni Panon ang hinagiban sa suspek.
Apan human mailog ang maong plamingko mikabad og dagan ang suspek hinungdan nga wala kini masikop ni Panon.
Hinuon sa gihimong follow-up sa kapolisan nasikop nila ang suspek ug gibalhug dayon sa prisohan. (BANAT NEWS)