Apo ni TF Chairman Dodong Gullas gilubong

CEBU, Philippines - Gihatud na kagahapon sa hapon ngadto sa iyang katapusang pahuwayan ang apo ni kanhi Kongresista Jose “Dodong” Gullas sa usa ka pribadong seremonya sa paglubong nga gitambongan sa mga kabanay ug labing suod nga higala sa banay’ng Gullas ug Weckman.

Mga alas 2:00 sa hapon gipahigayon ang misa requiem diha sa Carmelites Monastery sa barangay Mabolo, dakbayan sa Sugbo alang kang Kyle Julian Gullas Weckman.

Si Kyle gilubong diha sa Cebu Memorial Garden sa barangay Banilad ning dakbayan. Si Kyle usa sa duha ka mga tinun-ang naaksidente atol sa ilang education tour didto sa Subic niadtong milabay’ng semana.

Ang pamilyang Gullas, mga classmates ni Kyle ug mga kahigalaang nagbangutan ang mihatud kaniya sa katapusang higayon.  (BANAT NEWS)