CEBU, Philippines - Gawas ni Bise Gob. Agnes Magpale, walay mga sakop sa Barug Alang sa Kauswagan ug Demokrasya (Bakud) sa ikalimang distrito sa lalawigan sa Sugbo ang niapil sa kalihukan sa Liberal Party niadtong Sabado.
Ang LP sa Sugbo mipahigayon og tigom nga gitawag og Basic Orientation on Liberal Democracy (BOLD) sa wala pa ang pagpapanumpa sa bag-ong mga sakop.
Matud pa ni Magpale nga ang Bakud dunay kalihukan nga nadungan usab niadtong Sabado maong wala katambong ang ilang kaubanan apan gipasalig niyang ang mga sakop sa Bakud hugot nga nagsuporta sa LP sa Sugbo.
Ang Bakud nga gipangulohan ni Bise Mayor Ramon “Nito” Durano III sa dakbayan sa Danao kanhi kaalyado sa One Cebu Party sa niaging duha ka eleksiyon nakig-alayon na kini karon sa LP alang sa 2013 nga eleksiyon.
Si Magpale maoy kapares ni Hilario Davide III kinsa modagan pagkagobernador atbang ni Kong. Pablo John Garcia.
Si Magpale atbangan usab sa iyang ig-agaw nga si kanhi bise mayor Ramon “Boboy” Durano IV nga maoy kapares ni Garcia.
Nagpabilin sa One Cebu sa ikalimang distrito mao sila si Danao City Mayor Ramon “Boy” Durano Jr. ug Liloan Mayor Vincent Franco “Duke” Frasco nga mao karon ang kaalyado sa kanhi mga sakop sa LP sa niaging eleksiyon. (BANAT NEWS)