Intsik misuway'g lugos

CEBU, Philippines - Nagtingkagol sa karsel ang usa ka Chinese national human kini pasanginling misuway og lugos sa usa ka masahista pasado alas-4 sa kaadlawon diha sa iyang giabangang apartment nga nahimutang sa dalan Tres de Abril, barangay Pahina ning dakbayan.

Ang biktima nagpangidaron og 25-anyos nga usa ka masahista nga taga syudad sa Mandaue samtang ang suspek nga usa ka Chinese national nga taga Beijing, China gikatakda pang pasakaan og kaso karong adlawa.

Sa pakighinabi sa Banat News ni PO1 Richie Camillo, sa Cebu City Police Office, Operation Branch misaysay kini nga ang biktima gihagad sa suspek nga mangadto sa iyang apartment kay magpahilot kini.

Wala hinuon masuta kung giunsa pagkahitabo nga nagkaila ang duha. Apan giingong nagtoo ang biktima nga tinarong ang imbitasyon maong mikuyog kini.

Sa pag-abot nila sa apartment sa Intsik milahos sila sa lawak niini ug didto nakalitan ang biktima dihang gimandoan siya niining pahuboon sa tanan niyang sapot.

Sa pagdudang lahi na ang tuyo sa maong langyaw nagdumili ang dalaga sa pagtuman sa gusto niini apan gikatahong nasuko kini og maayo ug mihimo og mga lihok nga nakapahadlok sa dalaga hinungdan nga napugos siya sa pagsunod.

Dihadiha gisugdan og molestiya sa suspek ang dalaga kini wala na makaagwanta misiyagit kini ug nangayo og tabang.

Swerteng ang gwardiya sa maong apartment nakadungog daling miresponde ug misulod sa apartment sa suspek ug didto gitabangan ang dalaga ug gisikop ang suspek.

Ang suspek gidala ngadto sa San Nicolas Police Station diin kini gitanggong ug gikatakdang pasakaan og kaso karong adlawa. (/EIM)  (BANAT NEWS)