Pagpabasura sa Jaywalking Ordinance gibasura

CEBU, Philippines - Ang kadagkoan sa City Traffic Operations Management (CITOM) miawhag sa Cebu City Council nga ibasura ang awhag sa usa ka babaye nga wad-on na ang multa sa mga madakpan sa pagpataka’g labang sa karsada dinhi sa dakbayan, ilabi na kun mga tinun-an.

Ang madakpan sa paglapas sa Anti-Jay Walking Ordinance makamulta og P50 sa matag higayon nga sila masakpan, apan daghan ang dili makaabot sa pagbayad sa maong kantidad.

Kini maoy rason sa usa ka Marissa Gonzales ang miawhag sa Konseho sa dakbayan nga wad-on na lang ang pagpahamtang og multa sa mga masakpan nga makalapas sa Anti-Jay Walking Ordinance.

Apan si CITOM executive officer Rafael Christopher Yap namahayag nga dili maayo ang sugyot ni Gonzales nga tumanan.

Gihulagway usab ni Yap nga dili makiangayon ang pasangil ni Gonzales nga ibulsa ra sa ubang traffic enforcers ang ibayad nga multa sa pipila ka madakpan.

Matud ni Gonzales sa pasangil nga nakabantay siya nga ang ubang madakpan, ilabi na ang mga tinun-an, mohatag lang og P20 ug usahay P30, ug ang maong salapi igo lang ibulsa sa mga enforcers.

Nabantayan nga ang mga traffic enforcers nga nadestino diha sa downtown area manggukod g’yud sa mga tawong molabang sa karsada bisan og green pa ang signal sa mga sakyanan nga bawal man unta ang paglabang sama sa ilang gibantayan.

Si Yap namahayag nga walay basihanan ang pamahayag ni Gonzales. Ang abogado sa CITOM nga si Rico Abellanosa mipasabot usab nga kun ang usa ka madakpan sa Anti-Jaywalking team dili makabayad, ang ordinansa naglatid nga mahimo ra kini nga mo-render og civic duty bali’g upat ka       oras.

Matud ni Yap nga ang ilang tumong mao ang pagdisiplina sa mga tawo ug supak gani siya nga ang multa nga P50 paumentohan ngadto sa P3,000 sigun sa ordinansa nga gisugyot ni Konsehal Ritchie Osmeña.

Ang CITOM mokolekta og dul-an sa usa ka milyon ka pesos matag tuig sa koleksyon lang gikan sa multa sa madakpan pagpataka’g labang sa karsada, ilabi na diha sa downtown area. (BANAT NEWS)