CEBU, Philippines - Gipasidunggan ni Mayor Michael Rama ang daghang traffic enforcers ug ubang sakop sa City Traffic Operations Management (CITOM) nga nakahimo og maayong trabaho sa milabay’ng mga buwan nga ang uban dili na gani sakop sa ilang trabaho.
Si Rama personal nga mitunol sa plaque of appreciations ngadto sa mga awardees atol sa yano nga kalihukan atubangan sa City Hall kagahapon sa buntag.
CEBU,Philippines - Ang gipasidunggan mao sila Traffic enforcers Enrico Silagan, Pete Colina ug PO2 Adrian Cagalitan nga maoy nagtinabangay pagdakop sa usa ka snatcher nga nasakmitan usab nila’g pusil.
Sila si Traffic Enforcer Ivan delos Santos, Glenn Gatoc ug Ervic Navarro gipasidunggan usab kay nakadakop og holdaper nga armado og revolver. Nabawi pa gyud nila ang itom nga pitaka sa biktima nga may sulod nga P1,500.
Laing gipasidunggan mao si Traffic Enforcer Mark Anthony Melendres nga midakop usab og usa ka snatcher ug nabawi ang ariyos nga nalabni sa suspetsado gikan sa usa ka babaye.
Sila si Traffic Enforcers Julito Baldago ug Adonis Café gipasidunggan kay nakadakop usab og duha ka snatchers nga mibiktima og pasahero sa usa ka PUJ.
Ang laing mga traffic enforcers nga midakop og snatchers human makabiktima diha sa dalan Colon mao sila si Mario Reyes, Cronnie Cabatingan ug Marwin Igoy.
Matud ni CITOM executive assistant Jonathan Tumulak nga giparekomendar niya kang CITOM executive officer Rafael Christopher Yap nga hatagan og pasidungog ang maong mga traffic officers aron pagdasig sa uban nga sundon ang ilang mga lihok.
Ang mga traffic enforcers gitahasan lang unta sa pagmentinar sa kahapsay sa trapiko apan ang maong mga traffic enforcers miresponde sa pagpangayo’g tabang.
Bisan ang mga traffic enforcers sa CITOM walay armas apan gibansay sila sa paggamit og ulisi ingon man gitudloan sa mga pamaagi sa self-defense sa tumong nga mapanalipdan nila ang ilang kaugalingon.
Matud ni Tumulak nga giplano nila ni Yap nga ang paghatag og pasidungog sa mga traffic enforcers nga maayo og rekord hatagan og dugang ganti sama sa cash reward ug mga bugas.
Gisaaran usab ni Rama ang mga traffic enforcers nga ipahikay niya kang City Administrator Jose Marie Poblete nga ang mga sakop sa CITOM makaangkon og bag-ong uniporme.
Matud ni Mayor Rama nga kun dunay sobrang kwarta ang dakbayan palitan niya og mga bag-ong sakyanan ang CITOM. (/EIM) (BANATNEWS)