Dasmag lima angol

CEBU, Philippines - Lima ka mga tawo ang naangol gumikan sa dinasmagay sa mga sakyanan sa Marcelo Fernan Bridge habig sa dakbayan sa Lapulapu kagahapon sa kaadlawon. Ang mga angol mao sila Noedl Delila, 27, driver sa Mitsubishi Strada, nga taga barangay Pit-os , dakbayan sa Sugbo, Kazer Roland Lobeti, 24, kauban ni Delila, Bryan Andrino, 24, nga taga barangay Opao, dakbayan sa Mandaue, nga maoy drayber   sa Izusu passenger van ug ang iyang duha ka pasahero nga sila si Reynaldo Abrea ug Benjie Carreon, pulos taga dakbayan sa Mandaue.

 Si PO3 Johnny Hernandez, imbistigador sa   Traffic Division sa dakbayan sa Lapu-lapu, nagkanayon nga si Delila, 27 nagbiyahe padung sa dakbayan sa Lapu-lapu   sa alas 3:05 sa kaadlawon .  

Apan sa dihang padulhog na sila sa dakbayan sa Lapu-lapu kalit lamang nga gidasmagan ni Delila ang gisunod niyang Isuzu passenger van nga gimaneho ni Andrino kinsa nagbiyahe usab padung sa susamang direksyon luwan ang iyang duha ka mga pasahero nga nailhan nga sila si Abrea ug Carreon.

Gumikan sa kakusog sa sakyanan ni Delila, human modasmag sa likod nga bahin sa Izusu van, mitipas kini ngadto sa barandilya   sa Fernan bridge ug natulimbang ang maong sakyanan nga mibilin usab og lumping sa brandilya sa taytayan, samtang ang Isuzu van mitipas usab sa pikas lane.

Ang   mga pasahero sa Izusu van gihatud ngadto sa Chong Hua hospital samtang sila si Delila ug Lobeti didto dad-a sa Lapu-lapu City Hospital.

Matud pa ni Hernandez nga si Delila maoy sad-an sa maong hitabo sanglit siya man maoy midasmag sa Isuzu van. Kasamtangan kining gitanggong sa Lapu-Lapu City Police Office samtang gihikay na ang kaso batok kaniya. (/WC) (BANATNEWS)