Produksyon sa kaumahan gipauswag

CEBU, Philippines - Gumikan sa suporta nga gitunol sa Department of Agriculture naglayag sa kauswagan ang produksyon sa kaumahan sa mga mag-uuma sa bukirang mga   lugar sa dakbayan sa Sugbo.

Mao kini gibutyag ni Apple H. Leyson ang Assistant Cebu City Agriculturist kinsa nanguna sa usa ka farm tour kauban ang mga opisyal sa DA7 ug mga sakop sa Cebu media niadtong Biyernes sa buntag.

Ang Media Farm Visit misangko ngadto sa mga barangay Bonbon, Sudlon I ug Sudlon II   diin nasaksihan sa taga media ang mga maanindot kaayong tubo sa mga nagkalainlaing utanon, prutas ug uban usab sa mga hayop sama sa kanding, baka ug baboy.

Matud pa ni Leyson nga usa sa suporta nga gitunol sa kagamhanan ngadto sa mga mag-uuma gawas sa tabang pinansyal, mao ang mga teknolohiya bahin sa pananom.

Kini pinaagi sa mga gipahigayong mga seminar   kansang mga mamumulong pulos mga batid ug puno sa kasinatian bahin sa mga teknolohiya sa panguma.

Midugang si Leyson nga   may 11 ka agricultural technician sa Cebu City Agriculture Department   nga gitambayayongan usab sa mga technician sa DA 7 kansang kasinatian sa panguma ilang gipasaw-an sa mga mag-uuma sa kabukiran.

Didto sa barangay Sudlon 1, nasud-ong sa taga media ang usa ka proyekto nga mao ang Cebu Agricultural Tramline System.

Ang maong tramline system   nahimo pinaagi sa mga kabli nga gikutay gikan sa bungtod nga nahimutangan sa provincial road tapon sa laing bungtod sa gilay-on nga usa ka kilometro diin adto magsukad ang ikargang mga utanon aron itumod sa merkado sa dakbayan sa Sugbo.

Ang kahon nga maoy guyoron sa kabli makakarga og mga tunga sa tonilada nga utanon gikan sa mga kaumahan sa mga utanon sa Sudlon 1 sa usa lamang ka bira.

Matud pa ni Leyson nga pinaagi sa maong tramline naminusan ang gasto sa mga mag-uuma sa paghakot sa ilang mga produkto paingon sa highway tungod kay imbis baswaton nila o kaha ikarga og sakyanan , adto na sa tramline cable nila kini ipasakay.

Samtang didto usab sa Sudlon 2, ang kaumahan    sa nagkalainlaing mga utanon ug mga prutas, ingon man sa mga hayop sama sa baboy nga gipatubo ubos sa organic nga sistema sa pamuhi, mga baka nga gatasan ug mga kanding maoy pipila sa mga nasinatian sa maong media tour.

Ang grupo una mosagka ngadto sa mga bukirang barangay sa dakbayan sa Sugbo unang misil-ing sa herbal garden sa city agriculture department nga nahimutang sa South Road Properties (SRP).

Sumala ni Leyson nga ang tanang gipatubo nga mga tanom nga tambal uban sa mga utanon didto sa maong garden ipanghatag nga libre ngadto sa mga Sugboanon nga mangayo niini.(/WC)(BANATNEWS)