Upat nadakpang nangawat sud sa tindahan

CEBU, Philippines - Upat ka mga suspek, diin duha niini mga menor de edad ang nadakpan sa akto sa kapolisan nga nangawat sa nagkadaiyang mga baligya sa usa ka tindahan lakip na ang P500 cash   nga halin didto sa barangay Alo sa lungsod sa Oslob   sa miaging  gabii.

Ang mga suspetsado mao sila si Erland Codillero, 20 ug Legorio Yrauda Jr., 19, pulos mga ulitawo mga molupyo ra sa maong lugar.

Samtang ang biktima nga tag-iya sa tindahan mao si Marites Jose Merambel, 39 , minyo, kansang   bana usa ka seaman nga nagpuyo sa maong lugar.

Ang laing duha nga nadakpan mao ang mga bayong-bayong nga nagpangidaron og14 anyos ug 16 anyos.

Nasakmit sa kapolisan gikan kanila mao ang nagkalain-laing mga baligya sama sa chocolate, noodles, mga sardinas, sachet nga milo, ug mga baston sa sigarilyo, kape, gatas, junk foods ug uban pa ug gidala pa ang P500 nga halin sulod sa hunos.

Si PO3 Nelson Saquibal sa Oslob Police Station mibutyag sa Banat News nga giguba sa mga suspetsado ang flywood nga bongbong sa tindahan nga sumpay sa pinuy-anan sa biktima ug dihang na-abli na, ang duha ka menor de edad maoy gipasud ug dihang nakasud na mao na kini mi-abli sa pultahan ug misulod na ang mga hamtong.

Matud ni PO3 Saquibal nga didto sa sulod sa tindahan gihulagway nga mura og nag-shopping ang mga suspek nga nag-iyahay og gunit og mga baligyang pinutos nga maoy naabtan sa kapolisan.

Dali nila kining gidakop ug gidala sa ilang buhatan, ang duha gibalhug sa karsel samtang ang laing duha gitugyan sa kustodiya sa DSWD tungod kay mga menor de edad pa samtang gihikay ang tukmang sumbong nga ipasaka batok kanila.(/WC)(BANATNEWS)