CEBU, Philippines - Duha ka lalaki ang padayon karun nga nakigbisog sa ilang kinabuhi human kini gipamusil sa tulo ka lalaking nagmotorsiklo pasado alas 3 sa kadlawon diha sa sitio Upper Inayawan barangay Inayawan dakbayan sa Sugbo.
Ang mga biktima mao silang Carlito Caballero Cabaluna, 20, usa ka lumpia vendor ug molupyo sa sitio Paradise sa maong barangay ug ang usa padayon pang giila sa kapolisan nga gihulagway nga nagpangidaron og 30-anyos, adunay gitas-on nga 5’4 ngadto sa 5’5 ug nagsuot og blue nga t-shirt ug maong nga karsones.
Sa imbestigasyon sa Cebu City Police Office Homicide Section nasayran nga si Cabaluna gikan sa panimalay sa iyang mga higala diha sa sitio Torrel sa maong barangay.
Samtang nagbaklay kalit lang nga adunay mipatim-aw nga tulo ka lalaking nagsakay og motorsiklo ug sa walay igong hinungdan gipaulanan kini og bala ug naigo sa dapidapi ug nakahimo sa pagdagan.
Ang ikaduhang biktima nga wala pa mailhi gikatahong napagan lang ug mao karon nagrabehan tungod sa pagkaigo sa iyang ulo.
Ang duha pulos gidala ngadto sa Cebu City Medical Center samtang padayon pa sa ilang imbestigasyon ang kapolisan bahin sa nahitabo. (/EIM) (BANATNEWS)