CEBU, Philippines - Andam si Pinamungajan Mayor Geraldine Yapha nga makigsakbang ni Gob. Gwendolyn Garcia sa pagka-kongresista sa ikatulong distrito sa lalawigan sa Sugbo sunod eleksiyon.
Si Yapha dili pa ang opisyal nga kandidato sa Liberal Party apan nanukad na kining daan bisan si Garcia pa ang iyang ikaatbang.
Samtang si Garcia pabiling wala makig-atubang sa media bisan sibaw na kaayo ang hungihong nga dili na siya modagan pagka-senador ubos sa United Nationalists Alliance (UNA).
Si Garcia nakigtagbo niadtong Biyernes sa gabii sa Marco Polo Plaza sa mga mayor sa ikatulong distrito nga sakop sa One Cebu Party lakip nilang Bokal Alex Binghay ug Cesar Ian Geronimo Zambo.
Matud pa ni Asturias Mayor Allan Adlawan nga ilang gihangyo si Garcia nga modagan sa pagka-kongresista sa ikatulong distrito samtang si Binghay nga mao unta ang nagtinguha sa maong posisyon ang magpabilin sa iyang posisyon.
Mahimo usab nga mobalik si Binghay pagka-mayor sa lungsod sa Balamban nga kasamtangan karon nga gihuptan sa iyang anak nga si Mayor Ace Binghay.
Si Garcia nagdumili pa gihapon pagluwat og katin-awan sa posibling pag-atras niya sa tinguhang modagan pagka-senador.
Giangkon ni Yapha nga lig-ong kaatbang si Garcia sa pagka-kongresista apan andam niya kining atubangon. “It would be a good fight, I hope it will be a good one, too challenging,” nagkanayon si Yapha.
Matud pa ni Yapha nga nagtoo na siyang daan nga si Garcia ang i-endorso sa One Cebu nga padaganon sa pagka-kongresista sa ikatulong distrito hulip kang Kong. Pablo John Garcia nga maoy modagan sa pagka-gobernador. (/EIM) (BANATNEWS)