Puno way kontrol sa PNP

CEBU, Philippines - Giklaro sa mi-resign nga interior undersecretary Rico Puno kagahapon sa Senate inquiry nga wala siya’y gahom ug impluwensya sa bidding sa kontrata pagpamalit og armas ug mga gamit sa Philippine National Police. Sa gipatawag nga inquiry sa Senado, si Sen. Miriam Defensor-Santiago direktang nangutana kang Puno kung may kalambigitan ba siya sa PNP bidding process ug nakig-estorya ba kini sa mga suppliers isip sakop sa Bids and Awards Committee (BAC).

Si Puno kinsa gipasanginlang mironda sa condominium unit ni anhing interior secretary Jesse Robredo nga namatay sa plane crash niadtong Agosto 18 sa Masbate sumala pa sa mga nahaunang nanggawas nga reports giingong usa sa giimbestigar ni Robredo may labot sa pagpalit sa mga armas sa kapolisan.

 Hinungdan nga ang giingong pagronda niini uban sa mga polis sa condo unit ni Robredo nakapaduda sa mga magbabalaod ug ang nanggawas nga report nga overpriced ang pagkapalit sa mga pistola sa PNP nga may P1 bilyon kontrata alang sa 60,000 ka pistola. Kusganon hinuong gihimakak ni Puno ang maong report ug miklarong miadto siya sa condominium unit ni Robredo subay sa kamandoan ni Presidente Benigno Aquino III aron ‘i-secure’ ang mga dokumento ni Robredo.

Sa report sa GMA News Online, si Puno miklaro sa Senado nga isip sakop sa BAC usa lang siya ka " observer," ug dili siya makabotar kay ang iyang trabaho isip undersecretary mao ang pag- monitor ug paghatag og sugyot kung gikinahanglan.

Dihang gipangutana ni Santiago si Puno kung duna ba kini gahom aron pagkontrol sa PNP si Puno mitubag og 'no.'

Susamang inquiry usab ang planong ipatawag sa Ubos Balaybalauranan sa committee on public order and safety human gikwestyon ni AGHAM party-list Rep. Angelo Palmones ang proseso pagpalit sa mga gamit sa kapolisan.

Ang Trust Trade maoy midaog sa bidding nga napirmahan niadtong Septiyembre 10, sumala pa ni PNP Deputy Director General kinsa maoy PNP-BAC head Emelito Sarmiento, ang kontrata matud pa niya napasa na ngadto ni PNP chief Nicanor Bartolome kinsa gipaabot nga mo-approve o mokanselar sa sulod sa 15 ka adlaw sa maong kontrata nga magsuplay sa 9mm Glock 17 Generation 4 pistols. Nagduda hinuon si Sarmiento nga ang mga nangapilding bidders di kadawat sa desisyon sa BAC ug karon migamit sa media. Giingong nakamenus ang PNP og kapin P200 milyones   sa maong deal.

Samtang si Presidente Benigno Aquino III sumala pa sa mao gihapong report natagbaw sa maong pistola apan dili sa buwag nga kontrata sa pagpamalit sa M4 assault rifles sa kapolisan tungod sa kadako sa presyo niini matag usa komparar sa presyong makita sa internet. Ang pamaagi sa gobiyerno sa pagpamalit kinahanglang ang labing barato apan pareho og kalidad sa mahalon.( /EIM) (BANAT NEWS)