ILOILO CITY —Siyam ka mga babayeng tinun-an sa usa ka Catholic high school sa maong siyudad ang nagdungan og kakuyapan ug gituohang nasudlan og dautang espiritu niadtong Huwebes sa udto.
Ang mga tinun-an gikan sa nagkalainlaing year level sa San Jose Catholic School sa Plaza Libertad,Iloilo City daling gidala sa kasikbit nga simbahan ug giampoan.
Sumala pa sa mga reports, pipila sa mga tinun-an diha sa sulod sa ilang lawak nagklase ug ang uban diha sa gawas ug padulong nang maniudto dihang kalit nga nangakuyapan.
Pipila ka minutos ang milabay nagdungan og panghilak ang maong mga tinun-an ug ang uban mikisi kisi ug milugnot sa mga tawong misuway pagpakalma kanila.
Si Jun Rivera sa relihiyosong grupo nga Spring of Love Community maoy daling nangulo sa pag-ampo sa mga tinun-ang gituohang nasudlan og dautang espiritu apan nagdumili siya pagkompirmar nga dunay kalambigitan sa maong hitabo ang mga espiritu. (/EIM)(BANAT NEWS)