LP mihimakak sa pasangil

CEBU, Philippines - Giklaro sa Liberal Party (LP)   nga mipatawag kini og miting niadtong Septiyembre 5, 2012 sa tanang karaang mga lider sa LP nga diha na sa partido sukad pa niadtong piniliay sa 2010 aron lamang   sa pagpahibawo kanila kalabot sa mga bag-ong opisyal nga bag-ong nagpasakop sa maong partido. Pipila kanila mao sila si bokal Wilfredo Caminero ug Peter Calderon, mga mayor nga sila si Edsel Galeos sa Argao ug Raymond Calderon sa Samboan.

Si manlalaban Pauline Demano-Gothong, ang legal counsel sa LP- Cebu nanghimakak sa pasangil nga  ang maong miting gihimo aron pagtumbok o kaha pagpaila kun si kinsa ang mahimong kandidato opisyal sa partido sa pagka-kongresista gikan sa ika-duhang distrito.

Matud pa ni Gothong nga wala pay opisyal nga linya sa mga kandidato ang  LP gikan sa Segundo distrito sa pagkakaron nga giluwatan sa partido og Certificate of Nomination.

Midugang si Gothong nga ang LP gustong maminaw sa mga hunahuna ug sugyot sa mga daan ug bag-ong mga membro niini.

Gumikan niini gitakda  sa partido ang usa ka dakong panagtagbo karong adlawa Septembre 15, 2012 atol sa panumpa sa bag-ong mga membro sa LP   aron si LP Cebu Provincial Chair Hilario Davide III makahigayon sa pagpangonsulta ngadto sa tanan nga manambong nga mga sakop aron makahimo siya og rekomendasyon ngadto sa nasudnong liderato sa partido alang sa opisyal nga line-up sa mga kandidato   gikan sa lalawigan sa Sugbo alang sa piniliay sa tuig 2013.

Gibutyag ni Gothong nga kining maong katin-awan iyang giluwatan isip panghimakak sa nahaunang mga pamahayag nga napatik sa laing pamantalaan (di Banat News) bahin sa kalihukan sa LP sa pagtudlo og mga opisyal nga kandidato niini alang sa umaabot nga piniliay. (BANAT NEWS)