Gillamac nanamilit na sa MCPO

CEBU, Philippines - Nanamilit na kagahapon si Mandaue City Police Office Director Sr. Supt. Noel Gillamac sa iyang mga opisyal sa matag presinto sa kapolisan sa Mandaue human kini gikatakdang hulipan sa iyang katungdanan. Atol sa usa ka press conference kagahapon sa buntag, si Gillamac mipadayag sa iyang kalipay sa pagserbisyo sa dakbayan sa Mandaue sulod sa duha ka tuig ug walo ka bulan sukad niadtong bulan sa Enero tuig 2010.

Matud pa ni Gillamac malampuson siya sa iyang gihimong "crime prevention ug crime solution" policy nga gihimo sa iyang kapolisan sulod sa iyang termino diin daghan sa mga dagkong krimen ang nahatagan og kasulbaran ug nagmalinawon ang dakbayan sa Mandaue. Apan walay mahimo si Gillamac kung ang iya nang labaw ang magkinahanglan sa iyang serbisyo ug pinaagi sa pagbuhi kaniya ni Mayor Jonas Cortes andam siyang mobiya sa katungdanan nga magmalipayon.

Samtang si Cortes sa iyang bahin midayeg kang Gillamac sa pagdumala niini sa kapolisan sa dakbayan sa Mandaue.

Kagahapon 24 ka mga motorsiklo ang gihatag sa city hall ngadto sa mga sakop sa Traffic Efficiency Administration and Management (TEAM) ug sa MCPO alang sa ilang operasyon. (BANAT NEWS)