2013 budget sa DENR gipasalig nga magamit sa husto

CEBU, Philippines - Ang Department of Environment and Natural Resources (DENR)-7 mohingusog sa kampanya sa pito ka flagship program sa maong ahensya nga mopokus sa kalikopan ug maayong pagdumala sa budget nga gitagana.

Ang maong mga programang buot hingusgan ni Secretary Ramon JP Paje sa tuig 2013 mao ang limpyong hangin, limpyong tubig, solid waste management, pagkonserbar sa kalikopan, pagpanalipod niini, hustong paggamit sa yuta, hustong paggamit sa tubig, pagpataas sa buhis, pangandam alang sa climate change ug ang walay kurapsyon.

Ang DENR migahin og P725 milyones alang sa 2013. Aron masigurong gamiton sa husto ang pundo adunay ipahigayong tulo ka adlaw nga Regional Reprogramming Workshop sa Training Hall, Banilad sa syudad sa Mandaue karong umaabot Septiyembre 12 hangtud 24 ning tuiga.

Ang maong pundo mas dako og 28 porsiyento itandi sa budget niining tuiga nga nagkantidad lamang og P565.884.

Sumala pa usab ni Dr. Diana Apistar, officer-in-charge sa DENR nga tumong sa training nga matun-an kung asa gamiton ang maong pundo ug gipasalig niyang walay mausik nga salapi sa magbubuhis niini nga ang tumong magamit ang pundo aron makatabang sa nasud ug sa publiko.

Kini salmotan sa dul-an 40 ka mga partisipante gikan sa Provincial and Community Environment and Natural Resources Offices (PCENROs) sa upat ka probinsya, Regional Technical Directors gikan sa nagkadaiyang serbisyo, planning officers ug division chiefs, ang giingong aktibidad giorganisar sa PMD. (/EIM) (BANATNEWS)