Langyaw'ng nakulatahan sa SWAT miuli

CEBU, Philippines - Mipauli na kagahapon sa kaadlawon ang usa ka estudyanteng langyaw kinsa nakatilaw og kulata sa mga kapolisan sa dakbayan sa Sugbo sa miaging adlaw.

Si Benidict Penini, taga Papua New Guinea mipauli sa ilang nasud aron makapahungaw sa nasugatan niyang kagubot dinhi sa Sugbo sumala sa abogado niini nga  si manlalaban Fritz Lastimoso. Mibahad si Lastimoso nga kun makahukom ang ginikanan ni Penini nga mopasaka og kiha batok sa mga polis nga mikulata sa ilang anak, hayan nga mao kini ang atubangon nila ni PO2 James Philip Tanza ug PO2 Bradford Lavandero, pulos mga sakop sa Special Weapons and Tactics (SWAT).

Samtang si Sr. Supt. Ramon Buenafe, hepe sa Cebu City Police Office s a iyang bahin mibutyag usab nga andam silang makig-areglo kun ugaling ang kampo sa langyaw makig-areglo kanila, kini human siya makadawat og pahibawo nga murag makig-areglo kanila ang ginikanan ni Penini.

Apan matud pa ni Buenafe nga dili usab mawala ang kasong administratiba batok sa duha ka sakop sa SWAT kini tungod kay may sayop man sila nga nahimo.

Dugang pa ni Buenafe nga iya na usab nga gipahimangnoan ang tanang hepe sa kada estasyonan ug unit nga magmatngon sa ilang mga lihok ug angay ipatuman sa ilang mga sakop ang kalabot sa operation procedure.

Kahinumdoman nga niadtong Domingo sa buntag hubog kaayo si Penini nga nanghasi ug gihapak og bato ang nawong sa usa ka drayber sa taxi hinungdan nga giingong gipatiran kini ug gipusposan og pul-an sa armalite sa duha ka sakop sa SWAT nga sila si Tanza ug Lavandero. (BANAT NEWS)