CEBU, Philippines - Ang Team Rama nagpadayon sa ilang konsultasyon aron sutaon kun kinsay ihulip nila sa lugar ni kanhi Kongresista Antonio Cuenco kinsa miretiro na sa pamolitika.
Sumala pa ni Mayor Michael Rama nga maoy lider sa Team Rama nga gitahod niya ang desisyon ni Cuenco apan nagdumili siya paghatag og reaksyon sa mga huhungihong nga aduna sila’y negosasyon karon ni manlalaban Aristotle Batuhan.
Apan dali usab kaayong gipanghimakak ni Batuhan ang maong mga tabi-tabi kay alang kaniya dili pa karon ang tukmang panahon nga hisgotan ang maong isyu.
Matud pa ni Batuhan nga giatiman niya karon ang iyang mga programa sa kabarangayan nga gitawag nga Abante Barangay.
Ang maong mga programa gitumong alang sa panginahanglan sa nagkadaiya nga urban group sa habagatang distrito sa dakbayan.
Si Cuenco kinsa usa ka beteranong mangbabalaod sa nasud ug mao unta ang kandidato sa pagka-kongresista sa habagatang distrito sa dakbayan sa Sugbo ubos sa Team Rama miritero na sa pamolitika. - /WC (BANAT NEWS)