Krimen sa Probinsya sa Sugbo mikunhod

CEBU, Philippines - Ang lalawigan sa Sugbo maoy ikatulo sa ubos nga krimen base sa crime monthly report sa kapolisan matud ni Police Provincial Director, Patrocinio Comendador sa gipahigayong 888 Forum kagahapon sa buntag diha sa Marco Polo Plaza Hotel sa barangay Lahug, dakbayan sa Sugbo.

Gibutyag ni Comendador nga ang Sugbo maoy dunay dakong populasyon apan base sa monthly report sa kapolisan sa 100,000 ka tawo 17 lang ka mga insidente sa krimen ang natala. Usa sa nasutang hinungdan sa pagkunhod sa krimen mao ang night watch patrol sa kapolisan sa probinsiya.

Gipaniguro ni Comendador nga ang mga datos nila kabahin sa pagkunhod sa krimen dili kini minao-mao lang tinuod kini o “honest to goodness” nga crime report. Kagahapon nalakbit usab sa pangutana ang kabahin sa giingong kuyanap nga ilegal nga drugas sa dakbayan sa Carcar ug sa mga insidente sa patay usab sa maong siyudad.

Gawas niini ang kabahin usab sa sugal nga masiao diin ang mga masiao tip giingong naa lang gipangladlad daplin sa karsada.

Ang hepe sa kapolisan sa probinsiya nagkanayon nga sa milabay’ng duha ka semana wala nay nahitabong insidente sa patay sa dakbayan sa Carcar.

Ang kabahin usab sa ginadiling drugas matud ni Comendador nga ang kapolisan wala magpasagad niini ug kung magkataas ang populasyon motumaw usab ang mga problema.         Samtang ang mga pagpatay nga nahitabo sa Carcar ilang nasuta nga dili drug related kondili mga personal kining panagbangi. - /EIM (BANAT NEWS)