Petisyong P1.50 sa pletihan gipadaplin

 CEBU, Philippines - Tungod sa duha ka sunod nga pagkunhod sa presyo sa produktong petrolyo sa nakalabay’ng semana ang Cebu Confederation of Transport Operators and Drivers Association, Inc. wala mohinayon sa ilang planong pag-file og petition nga P1.50 dugang sa minimum nga pletihan.

Si Ryan Benjamin Yu, CCTODAI chairman mibutyag nga nadesisyonan unta nila niadtong Biyernes nga ipasaka niadtong Lunes ang petisyon apan tungod sa price rollback nausab ilang plano.

"Pero amo-a lang sa ge-deferred ang among petisyon nga e-file unta namo pag Lunes, pero tungod sa price rollback, e-hold lang sa namo," matud pang Yu kinsa mao usab ang chairman of the Cebu Integrated Transport Service Multi-purpose Cooperative (CITRASCO).

Ang diesel price mikunhod og .25 centavos matag litro ug.30 centavos matag litro niadto lang Sabado ug Domingo.

Matud pang Yu bisan pa man hinuon sa price rollback duna silay nadunggang report nga dunay magsunod nga pagsaka sa presyo sa petrolyo sunod semana.

Ang CCTODAI gilangkoban sa tanang mga transport groups  sa Central Visayas.

Ang CITRASCO maoy mipetisyon sa Land Transportation Franchising and Regulatory Board-7  alang sa P1.50 nga dugang sa minimum nga pletihan sa Central Visayas sayo ning tuiga, apan nabasura kini tungod sa pagbarato sa presyo sa lana niadtong Mayo ning tuiga, gani gipaubsan ngadto sa P7.50 ang pletihan gikan sa P8 tungod sa price rollback, apan wala kini tahora sa mga drayber. (BANAT NEWS)