Disgrasya 1 patay, 2 angol

 CEBU, Philippines - Namatay  ang drayber sa motorsiklo ug kritikal usab ang kahimtang sa angkas niini dihang ilang nadasmagan angol  ang  usa ka  bayong-bayong  didto sa Sitio Campo barangay Bantigue, sa isla sa Bantayan niadtong Lunes sa alas 3:00 sa kaadlawon.

Ang namatay mao  si Cenon Rivera, 30, ulitawo,  nga nagpuyo sa barangay Guiwanon, Bantayan, samtang  ang  duha  ka  angol  mao  sila  si  Wilson Navarro, 22, ulitawo, nga taga  barangay Binabao, Bantayan, kinsa  maoy  angkas   ni  Rivera ug  Mark Carabio, 16, ulitawo, tigbantay sa poultry nga taga  isla  sa Kinatarkan.

Si PO1 Roldan Tinapay sa Bantayan Police Station mibutyag  sa Banat News   nga  si Rivera nga maoy  nagmaneho  sa motorsiklo  ug  si  Navarro  nga  iyang  angkas nagpaingon sa provincial road  sa Bantigue.

Apan  dihang  duol na sila  sa provincial road  aksidenteng  nasaghiran  sa motor  si  Carabio  kinsa  naglakaw  sa  karsada  sa maong  higayon.

Unya mibaliwliw    ang  dagan  sa motorsiklo  hangtud  nga  nawad-an og  kontrol  niini  si Rivera  ug  nalamba  sa karsada.

Si Rivera ,  Navarro ug Carabio gihatud  dayon  ngadto  sa  Bantayan District Hospital apan sa pagka- alas 7:30 sa buntag  namatay gyud si Rivera.

Si  Navarro  giatiman  pa  sa  mga doctor  sa paghimo  ning  balita  samtang  si Carabio nakagawas dayon  sa tambalanan  human  madapati og  tambal  ang  ilang  bun-og  ug  pangos  sa lawas.( /WC) (BANAT NEWS)