CEBU, Philippines - Gipusil patay ang usa ka tanod samtang nagtanaw og singalong contest sa basketball court ug napagan ang 26 anyos nga ginang human milapos ang bala sa ulo ug didto moigo sa dughan niini sa barangay Kanguha lungsod sa Dumanjug niadtong Domingo sa alas 9:00 sa gabi.
Ang biktima nga patay diha diha mao si Romulo Sardido, 31, tanod sa maong lugar ug ang napagan mao si Melogen Cabase, 26, molupyo ra sa maong lugar.Samtang ang gitumbok nga suspek mao ang usa ka Bobby Dela Cerna nga taga barangay Apo sa lungsod sa Argao ug nga giingong wanted usab tungod sa kasong pagpatay. Matud ni SPO2 Florencio Clarion sa Dumanjug Police Station dihang nahinabi sa Banat News naglingkod sa sulod sa basketball court ug nagtalikod sa koral nga semento ang biktima ug nagtanaw sa kalingawan tungod kay bisperas sa kapistahan sa maong lugar.
Ang suspek matud pa nangita kini sa usa ka Jovy Cababat nga maoy iyang kontra ug pagabot sa maong lugar nakitan niini ang biktima nga suod nga higala sa iyang kontra ug maoy iyang gipahimungtan gamit ang wala pa matino nga kalibre sa armas.
Patay diha diha ang tanod samtang gidali pagdala sa Barili District Hospital ang ginang ug didto nakatugan kini sa mga polis sa pangalan sa suspek Ang babaye gidali paghatud sa tambalanan lahos dinhi sa dakbayan sa Sugbo tungod kay anaa sa seryoso nga kahimtang. Ang kapulisan padayon pa sa ilang hot pursuit operation batok sa suspek kinsa matud pang Clarion wanted na usab sa kasong murder ug mitago didto sa Negros apan subling nakapatay didto ug mibalik dinhi sa Sugbo. (BANATNEWS)