Digal ug Natuel apil sa pilian pagka MCPO director

CEBU, Philippines - Giduso na ni Police Regional Office Director Marcelo Garbo ang listahan sa mga posibleng mamahimong hepe sa kapolisan sa syudad sa Mandaue sa buhatan ni Mayor Jonas Cortes. Ang mga pilian nga ihulip kang Mandaue City Police Director Noel Gillamac mao sila si Sr. Supt. Erson Digal; Sr. Supt. Mariano Natuel Jr.; Sr. Supt. Petroneli Baldribrin; Sr. Supt.Marciano Batiancela; ug Sr. Supt. Eddie Benigay.

Matud pa ni Garbo nga nakaabot na si Gillamac sa duha ka tuig nga limit pagkadirektor sa MCPO. Apan giklaro usab ni Garbo nga adunay bagohay lang nga direktiba si PNP Chief Nicanor Bartolome nga mamahimo nang mohangyo ang mga Local Executives kun ganahan pa silang patasan pa ang serbisyo sa usa ka hepe sa kapolisan sa ilang dakbayan.

Dugang pa ni Garbo nga mamahimo usab nga mopili og laing opisyal nga maoy ihulip kini bisan pa man og wala sa ilang giduso nga listahan. Sa nasayran nga taudtaud na usab nga wala buhii ni Mayor Jonas Cotes si Gillamac tungod kay nakauyon siya sa serbisyo niini. Gawas ni Gillamac gikatakda na usab nga hulipan si Cebu City Police Office director Melvin Buenafe, apan ning bagohay lang si Mayor Michael Rama mipadayag nga buot pa niyang ipabilin si Buenafe sa CCPO tungod sa maayo niining nahimo sa kampanya batok kriminalidad. (BANATNEWS)