CEBU, Philippines - Mokapin sa 6,000 ka mga miyembro sa Social Security System (SSS) sa probinsya sa Sugbo ang mipahimus sa nagpadayon nga loan amnesty program nga gitakdang tak-opan karong Septembre 30 ning tuiga.
Matud pa ni Helen Solito, ang Assistant Vice President sa SSS sa Central Visayas nga sa maong gidaghanon mikabat usab og P70 milyones ang katibuk-ang kantidad ang nabayran sa mga hingtungdan.
Matud pa ni Solito nga angay pahimuslan sa mga membro sa SSS ang pipila pa ka adlaw nga nahibilin una taposa sa maong ahensya ang loan condonation program niini. Kini aron pagsiguro nga dili magbaguod ang mga nakautang sa pagbayad sa ilang obligasyon ngadto sa SSS. Apan labaw sa tanan may madawat pa nga benepisyo ang usa ka membro sa iyang retirement , total disability ug death o kamatayon, matud pa ni Solito.
Gipasabot niya nga kun dili makabayad ang usa ka mangungutang sa iyang loan, inig-ritero niya wala siyay madawat tungod kay ang dawatonon unta niya maoy may kobrahon sa SSS aron pagtapak sa wala niya kabayring utang.
Midugang si Solito nga ang utang nga di kabayran sa hustong petsa nga tingbayad niini magtubo og tagsa ka porsento busa bug-at na kaayo ang pagbayad niini pag-abot sa adlaw.
Ang laing epekto sa di kabayrang utang mao ang kadugay makadawat og pension sa utangan kay paabuton pa nga mabayran sa iyang pension ang katibuk-an niyang utang nga wa mabayri. Sayo niini gibutyag ni SSS Chief Executive Officer Emilio de Quiros Jr. nga mihatag sila og amnestiya sa mokabat og 80,000 ka mga mangungutang sa tibuok nasud nga may bayranang mokabat og P1.03 bilyones kansang tubo o interes mikabat usab og P591 milyones. (Liezl M. Frasno-Correspondent/WC) (BANAT)