3 ka drug pusher tiklo

CEBU, Philippines - Tulo ka suspetsadong illegal drug pusher ang nasikop sa mga kapolisan sa dakbayan sa Mandaue ug sa lungsod sa Cordova sa miaging kaadlawon.

Ang nasikop sa buy bust sa kapolisan sa Mandaue mao sila si Vicente Cuizon, alyas Bilot, 47, ug Retchie Espejon, 40, minyo, nga pulos nagpuyo sa dalan Plaridel, barangay Alang-Alang sa maong dakbayan.

Samtang ang nasikop sa Cordova nailhan nga si Mark Sumalinog Nuñez, 29, ulitawo nga taga sitio Ilaya, barangay Ibabao, lungsod sa Cordova

Matud pa ni SPO2 Juan Ondoy Calamba sa Mandaue City Police Office nga nasakmit kang Cuizon ang usa ka pakete nga shabu ug laing duha usab ang nasakmit gikan kang Esperon uban sa P300 nga buy bust money.

Si SPO2 Calamba miingon nga ang maong buy bust ilang gilusad dihang natino nila ang kalihokan sa mga suspetsado sa pagpamaligya og gidiling drugas.

 Samtang si SPO1 Danny Alburo sa kapolisan sa Cordova nga nahinabi sa Banat News miingon nga si Chief Inspector Alvin Bolio, hepe sa kapolisan sa maong lungsod maoy nangulo sa buy bust operation nga ilang gilusad sa barangay Ibabao sa alas 2:00 pasado ang takna sa miaging kaadlawon.

Matud pa ni SPO1 Aburo nga gitunol ni Nunez ang usa ka pakete nga shabu ngadto sa ilang police decoy samtang ang bayad   nga salapi   gidawat usab sa kauban ni Jek-Jek Degamo, ang kauban ni Nuñez.

Apan si Degamo abtik    nga nakamatikod nga police decoy ang mitunol kaniya og kuwarta busa mikabad kini og dagan  pahilayo sa maong lugar samtang si Nuñez nga wala makabantay maoy nasikop sa mga otoridad. (Romeo T. Limpangog ug Darrel A. Carumba/WC) (BANAT)