Gitusak sa kutsilyo kritikal

CEBU, Philippines - Nabulit sa samad dinunggaban ang lawas sa usa ka tawo nga gidunggab sa iyang silingan sa barangay Day-as lungsod sa Cordova sa miaging udto.

Ang biktima mao si Jestone Baguio, hingkod, nga nagpuyo sa maong lugar samtang ang suspetsado mao usab si Marque Pacaldo, 18 , ulitawo nga iyang silingan.

Si SPO1 Danny Alburo sa kapolisan sa maong lungsod nga nahinabi sa Banat News miingon nga samtang nagbarugbarog si Pacaldo sa atbang sa usa ka tindahan sa maong dapit kalit lang mihunong ang usa ka traysikad sa iyang atubangan dayon nanaug si Baguio ug gikulata siya.

Dihang misakuong na sa kasakit ang suspetsado misirit kini og dagan pauli sa ila ug sa pagtuo nga mibahag ang ikog niini sa kahadlok puwerting lipaya ni Baguio.

Dugang pa ni SPO1 Alburo nga mibalik si Baguio og sa kay sa traysikad paingon sa barangay Poblacion sa maong lungsod ug pipila ka oras ang nakalabay mibalik na usab siya unya nasigpatan na usab niya si Pacaldo didto gihapon sa maong dapit nga nagbarugbarog gihapon sa daplin sa karsada.

Busa nanaug na usab si Baguio sa giluwanan niyang traysikad ug gikulata na usab niya si Pacaldo, apan milanit ang naulahi sa iyang kutsilyo ug gitusaktusak niini ang lawas ni Baguio.

Matud pa ni SPO1 Alburo nga nabulit sa samad dinunggaban ang lawas sa biktima ug gihatud dayon kini ngadto sa Lapulapu City Hospital apan gibalhin ngadto sa Vicente Sotto Memorial Medical Center sa dakbayan sa Sugbo.

Si SPO1 Alburo miingon nga mitahan hinuon ngadto sa ilang buhatan si Baguio ug sa ilang pagsukitsukit niini, mitug-an ang suspetsado nga may kasuko nga personal kaniya ang biktima.  (BANAT NEWS)