Motor nalamba sa karsada 2 angol

CEBU, Philippines - Talandugon ang kahimtang sa usa ka drayber sa habal- habal ug ang babaye nga pasahero niini human malamba ang motorsiklo nga ilang gisakyan tungod sa kadangog sa dalan didto sa barangay Liki lungsod sa Sogod kagahapon sa alas 4:00 sa kaadlawon.

Ang naangol mao si Gilberto Salogaol, 34, minyo nga taga sitio Bontilao , Liki nga drayber sa habal-habal ug si Analyn Jorquia Aying, 28, minyo, nga silingan ni Salogaol.

Si PO1 Terso Coming sa Sogod Police Station mibutyag sa Banat News nga samtang nagpaingon sa dakbayan sa Sugbo ang mga biktima nag-ikis-ikis ang dagan sa motor pag-abot sa maong dapit gumikan sa kadangog sa karsada human sa kusog nga uwan sa maong higayon.

Apan sa tantong limbag-limbag niini nawad-an sa panimbang ang drayber ug nalamba ang motorsiklo uban sila nga sakay niini.

Gumikan kay pulos walay helmet maayong pagkabunal ang ilang mga ulo sa karsada nga sementado.

Hinuon gumikan kay lig-on ang ilang ulo, wala kini makaangin sa ilang kinabuhi apan nakasinati sila og mga pangos ug bun-og sa lawas ug gipatambalan dayon sila sa usa ka tambalanan ning dakbayan sa Sugbo. (Darrel A. Carumba/WC).