P100K sa mag-edad og 100 ka tuig

CEBU, Philippines - Adunay maayong pahalipay ang dakbayan sa Sugbu alang niadtong mga tawong makaabot og sentenaryo o edad nga 100 ka tuig, P100,000 nga malabong pahalipay.

Apan sumala pa kinahanglang makapamatuod sila nga nakapuyo sila dinhi sa siyudad og dili mominos 10 ka tuig.

Napasar sa konseho ang maong ordinansa sa miaging adlaw nga gipangamahanan ni Konsehal Rodrigo “Bebot” Abellanosa nga ang tumong mao ang paghatag og pasidungog ug pag-ila sa mga katiguwangan.

Nasayran nga sa dili pa ihatag ang cash incentive, aduna gyud kini seremonya kung diin tagaan gyud og plaque ang maong senior citizen.

Ang rekognasyon himuon gyud sa buwan sa Oktubre matag tuig sanglit gitawag kini og Senior Citizens Month.

Ang siyudad sa Sugbu daan nang maghatagan og financial assistance sa mga senior citizen matag tuig nga moabot sa P7,000 matag usa nga gihangop og maayo sa mga katiguwangan sa siyudad.

Samtang usa ka 87-anyos nga senior citizen nga si Eriquillo Monsarate ang misaysay dinhi sa Banat News nga misamot ka ganado ang iyang tinguhang motaas pa ang iyang katuigan dinhi sa kalibotan.

“Nindot nang gibuhat sa siyudad kay dili gyud nila pasagdan ang mga katiguwangan. Mas ampingan pa nako og maayo ang akong lawas aron makaabot ko anang edara,” sumala pa ni Monsarate.  (BANAT NEWS)