Kabalayan sa guadalupe gilunopan

CEBU, Philippines - Kapin sa 50 ka panimalay ang naapektahan sa nahitabong pag-awas sa tubig sa sapa sa barangay Guadalupe ug barangay Sapangdaku kagahapong adlawa.

Ang kapitan sa barangay Guadalupe nga si Michael Gacasan nga nahinabi sa Banat News mibutyag nga tungod sa kakusog sa ulan sa bukid miawas ang tubig niini.

Matud pa ni Gacasan nga adunay pipila ka panimalay nga nasudlan og tubig gikan sa sapa bisan wala moulan sa ilang barangay nga nakaguba sa mga kabtangan ilabi na sa sitio Sandayong.

Butyag usab ni Gacasan nga gibana-banang mokabat sa P300 mil ang kantidad sa danyos sa maong pag-awas sa tubig.

Usa sa gibasol ni Gacasan ang proyekto sa Department of Public Works and Highways diha sa ubos nga bahin sa maong sapa maoy hinungdan nga nakabara sa tubig.

Samtang ang kapitan sa barangay Sapangdaku nga si Lorna Damalerio mibutyag usab nga walay panimalay nga naanod atol sa maong pag-awas apan daghang mga butang nga nadaot.

Ang kapolisan, kabomberuhan ug city disaster council padayong nag-monitor sa dapit ug mipahiklin una sa mga molupyong naapektahan.

Ang pipila sa mga taytayan sa Gen. Maxilom ug Tejero namatikdan nga hapit na lapawi sa tubig nga gikan sa Guadalupe kagahapon. - Lesley Caminade-Vestil/EIM (BANAT NEWS)