CEBU, Philippines - Gihangop ni Governor Gwendolyn Garcia ang tanyag ni Mayor Maria Luisa Loot nga mosalmot na sila sa Suroy Suroy Sugbo karong sunod nga bulan. Kini ang gibutyag sa gobernador ngadto sa mga sakop sa media atol sa iyang pakigtagbo sa mga opisyal sa kagamhanan sa amihanang bahin sa Sugbo.
Ang maong tigum gitambongan usab nila ni board member Sun Shimura ug Joven Mondigo Jr. ug mga mayor nga sila si Duke Frasco sa Liloan; Eusebio Dungog sa Tabogon; Bernard Sepulveda sa Borbon; Salvador dela Fuente sa Madridejos ug mga tourism officer sa mga kalungsoran ug dakbayan sa amihanang bahin sa lalawigan.
Nasayran nga tulo ka adlaw ang gigahin sa maong kalihokan ug gibanabanang 200 ngadto sa 300 ka mga lokal ug langyaw’ng mga turista ang mosalmot ug mokuyog sa maong kalihokan karong tunga-tunga sa Septiyembre.
Ang mga lungsod nga gitakdang bisitahon ug suroyon sa mga turista maglangkob sa Consolacion; Compostela; Danao City; Carmen; Sogod; Medellin; Daanbantayan; San Remegio; Sta Fe; Madridejos; Bantayan; Bogo city; Tabogon; Borbon; Catmon ug Liloan. (BANAT NEWS)