Handbook kontra kurakot sa city hall ipanghatag

CEBU, Philippines – Gikatakdang ipang apud-apod sa siyudad sa Mandaue ang usa ka handbook nga gitumong alang sa pagpugong sa “red tape” ug pagpangurakot sa city hall. Ang maong handbook usa sa mga proyekto ni kanhi interior secretary Jesse Robredo nga unang giapod-apod didto sa ilang dapit sa Naga City.

Ang maong handbook maoy mogiya sa publiko kung giunsa o unsang mga proseso ang agian sa mga transaksyon ug mga dokumento diha sa city hall, ning paagiha dili na masaag ang katawhan ug dili na usab makahigayon pa ang mga kawatang kawani sa gobiyerno nga makapangwarta.

Ang handbook maoy nag-una sa mga kalihokan ang paglusad sa Mandaue City Citizen Charter Handbook nga pagahimoon sa Cebu International Convention Center sa dakbayan sa Mandaue.

Si Mandaue City Treasurer Regal Oliva sa iyang pamahayag ngadto sa mga tigbalita niadtong miaging adlaw iyang gipadayag nga 15,000 ka mga handbooks ang ilang ihatag ngadto sa lainlaing buhatan nga pribado ug mga molupyo sa kabarangayan.

Gipasabot niya nga ang pagpang-apod-apod sa mao nga mga handbook ilang ipaagi ngadto sa mga barangay lider nga gilangkoban kini sa duha ka pinulongan nga naglakip sa English ug Visayan version. Dugang pa ni Oliva nga unang bahin sa maong handbook mao ang labot sa paghatag og kasayuran sa mga tax payers kun unsa gyud kadali o kadugay ang paggawas sa gi-process nga mga dokumento nga naglakip sa business permits, tax, real property tax, occupational tax ug ingon mga building permits.

Giangkon ni Oliva nga ang mga tax payers mahimong makakiha ngadto sa mga kawani sa gobiyerno kun dili man ugaling makiangayon ang pagkalangan sa ilang mga dokumento. (EIM) BANAT NEWS