CEBU, Philippines – Miinsister ang tagdumala sa Salazar Institute of Technology (SIT) Madredijos Campus nga wala na kinahanglana nga molukat pa sila og mayor’s permit aron legal nga maka-operate ang maong tunghaan.
Matud ni kanhi Madredijos mayor Doroteo “Dodo” Salazar nga tag-iya sa maong tunghaan atol sa interbyu sa dyDD kadto lang mga establisamentong gitumong sa pagpamatigayon ang gi-obligar paglukat og mayor’s permit.
Gipasabot ni Salazar nga dili sakop niini ang iyang tunghaan tungod kay usa man kini ka Non-Stock Non-Profit Organization.
Gihimong basehanan ni Salazar ang mga dagkong unibersidad dinhi sa dakbayan sa Sugbo nga wala usab magbayad og buhis dinhi sa dakbayan.
Apan sa pagkatinuod ang kagamhanan sa dakbayan sa Sugbo adunay pending nga mga kasong gipasaka batok sa maong mga tunghaan tungod sa wala pagbayad og buhis tungod kay dili tinuod nga walay kwartang gikita ang mga tag-iya sa pag-operate niini. Dugang pasabot ni Salazar nga silang mga tagdumala og tunghaan adto lang molukat og permit sa Commission on Higher Education (CHED) tungod kay mao kini mando sa balaod.
Nunot niini giklaro sab ni Salazar nga wala siyay planong modayun pagsang-at og reklamo batok sa mga lokal nga opisyal sa lungsod sa Madredijos ug mga organizers sa Pasigarbo sa Sugbo nunot sa kapakyas pagpananghid kaniya sa pag-apil sa 26 nila ka mga tinun-an sa nilabay’ng Pasigarbo sa Sugbo. Ang lungsod sa Madredijos 3rd placer kini sa nilabay’ng Pasigarbo sa Sugbo. Ang maong mga tinun-an wala na dawata sa SIT tungod sa rason nga wala sila mananghid ug ang mayor sa Madredijos nga sila moapil sa Pasigarbo. Si Mayor Salvador dela Fuente una nang mibutyag nga wala molukat og mayor’s permit ang maong tunghaan apan iyaha lang kining gipasagdan tungod kay nalipay siya nga nagpaangay kini og edukasyon sa mga molupyo sa lungsod sa barato nga matrikula.
Nagtahap hinuon si Mayor Dela Fuente nga napagan lang sa politika ang maong mga tinun-an ug mipasalig nga iyaha kining tabangan nga makapadayon pagtungha.
Ang maong mga tinun-an una nang midangop ug nagpatabang sa Department of Education tungod sa wala na pagpasulod kanila sa maong tunghaan. (EIM) BANAT NEWS