Gamay ra ang budget alang sa drainage system

Daw gibasol ni Mayor Michael Rama ang konseho tungod sa padayong paglunop sa downtown area sa siyudad sa Sugbo panahon nga dunay kusog nga ulan sama sa nahitabo niadtong milabay’ng adlaw’ng Martes.

Si Rama nangayo og pasaylo sa mga Sugbuanon nga naapektohan sa grabeng pagbaha ug matud pa niini kuwang ra gyud kaayo ang budget alang sa drainage system projects sa siyudad nga gitugutan sa Konseho.

Nagkanayon ang mayor nga giigo-igo na lang sa siyudad ang P100 million nga budget nga giaprobahan sa konseho alang sa drainage system apan kulang gyud kini kaayo.

Kahinumduman nga miduso og P500 milyones nga budget si Rama kaniadto alang sa drainage project plan apan P100 milyones lang ang gi-aprobahan sa konseho nga mayoriyang sakop sa Bando Osmeña Pundok Kauswagan (BOPK) nga dili kaalyado ni Rama.

"Pasayloa ko nga mao na'y nahitabo pero ato nang gibalikbalik nga apil na sa atong priority apan gitangtang sa konseho."

Nasayran nga daghan nahasol nga mga tawo sa nagkadaiyang kadalanan sa siyudad sa miaging adlaw nga miresulta sa bagang duot sa trapiko.

Base sa report sa City Traffic Operations Management (Citom) mosamot gyud kahuot ang trapiko sa mga dalan sa siyudad kung dunay pagbunok sa ulan sama sa Barangay Banilad, Salinas Drive ngadto sa Juan Luna Ave., Gorordo Ave. Gen. Maxilom Avenue ug Kinasang-an Pardo.

Napanglantawan sa mayor nga tataw kaayo nga dili ganahan ang konseho nga magmalampuson ang iyang administrasyon.

“Wala man nay problema nako kung mapilde ko sa sunod nga eleksyon, ang ako lang kay dili lang unta mag-antos ang mga tawo,” nagkanayon si Rama.

Ang BOPK gipangulohan ni Kongresista Tomas Osmeña kinsa maoy makaatbang ni Rama sa sunod nga piniliay.

Nagkanayon si Rama nga sunod tuig, moduso siya og P2.4 bilyones nga budget alang sa komprehensibong drainage system sa dakbayan ug siya nanghinaut nga aprobahan kini sa konseho. (EIM) BANAT NEWS