MGB molusad og geohazard mapping

CEBU, Philippines – Dul-an sa 74 ka mga barangay sa lalawigan sa Sugbo nga gilangkuban sa usa ka syudad ug usa ka lungsod   gikatakdang pahigayonan og geohazard mapping sulod sa upat ka semana nga gamitan og scale nga 1:10,000 gikan Septembre 10 hangtod Oktubre 5 ning tuiga.

 Sumala pa ni Regional Director Loreto Alburo sa Mines and Geosciences Bureau (MGB) 7 nga ang giingong scale makahatag og dugang detalye sa mga dapit nga masulod sa mapa nga mobutyag sa tinuoray nga kahimtang pisikal ug sa kalikopan sa matag lugar.

 Ang team sa   mga senior geologist nga gilangkuban nila ni Maria Elena Lupo ug Josephine Aleta   maoy moila kun ang matag purok o sitio sa usa ka barangay humok ba og yuta nga peligro sa pagdahili ug pagbaha. Ang mga mahinungdanong impormasyon nga mahimong masuta sa 1:10,000-scale geohazard map maglangkob sa mga parametro ug postura sa dapit nga moila kun kini modahili ba o kaha bahaanan sa panahon sa tinguwan.

 Ang team nga may duha ka membro   moila usab sa mga dapit sa barangay   nga posibleng pabakwitan kung pananglit adunay katalagman nga moabot. Gibutyag ni Alburo nga ang prayoridad sa maong proyekto maglangkob sa 20 ka mga barangay sa San Fernando ug 54 ka mga nahabiling barangay sa syudad sa Sugbo. Ang 1:10,000-scale geohazard map gipaabot nga makompleto sa tuig 2014.

 Dugang pa usab ni Alburo nga ilang gipalapdan ang ilang kampanya sa paghatag og impormasyon sa maong mga barangay sanglit ang ilang mga geologist inubanan sa Local Government Units (LGU’s) mohisgut man kalabot sa resulta niini ug dinaliang rekomendasyon usab human nila kini maabalo.

 Gipasabot usab ni Alburo nga ang mga assessment team maoy moluwat og tukmang pasidaan kalabot sa peligro sa palibot nga dawaton usab sa mga opisyal sa barangay aron kasugdan dayon  nila ang pag-umol og mga posibleng panukdanan kalabot sa pag-ubos sa usa ka lugar nga peligro. Ang geohazard map usa ka mahinungdanong gamit sa disaster risk reduction and management , matud pa ni Alburo. (WC) BANAT NEWS