CEBU, Philippines – Gipaubos sa state of calamity ang Purok Coconut II sa barangay Umapad , dakbayan sa Mandaue nga naigo sa sunog sa miaging Lunes sa gabii diin 110 ka balay ang naugdaw.
Si Barangay Kapitan Nelson Rubio sa Umapad nga nahinabi sa Banat News kagahapon miingon nga ang resolusyon kalabot sa maong deklarasyon giaprobahan atol sa ilang special session nga gipahigayon human sa maong katalagman.
Gipasabot niya nga ang pagdeklarar sa konseho sa barangay nga ubos sa state of calamity gitumong aron makagamit sila sa ilang calamity fund sa barangay nga itabang sa tanang nabiktima alang sa mga materyales sa tukoron nilang mga balay.
Matud pa ni Rubio nga ang ilang resolusyon gipadala dayon nila ngadto sa konseho sa dakbayan sa Sugbo aron mao kini basehan sa ipagawas nga calamity fund nga mobalor og P239 mil kapin.
Matud pa ni Rubio nga base sa listahan sa City Social Welfare Office (CSWO) nga gipangulohan ni Violita Cabada mikabat sa 141 ang nalista nga mga tag-iya og balay, samtang 48 usab ang mga nanag-abang lang sa maong lugar.
Gitataw niya nga gawas sa tulo ka adlaw nga pagsilbi og luto-daan nga pagkaon ngadto sa mga biktima daghan pang mga hinabang nga inamot sa nagkalainlaing sektor sa dakbayan sa Mandaue. Dugang pa ni Rubio nga nadawat na usab nila ang hinabang gikan sa kagamhanan sa lalawigan sa Sugbo pinaagi ni Gobernador Gwendolyn Garcia.
Naglakip kini sa 50 ka sako nga NFA rice, 25 ka karton nga sardines, 15 ka karton nga instant coffee, 20 ka sako nga used clothing, 200 ka banig, ug 200 ka mga habol nga ang tanan mikantidad og P200 mil. Gitug-an ni Rubio nga niadtong miaging gabii si 3rd District Congressman Pablo John Garcia personal usab nga mibisita sa barangay Umapad ug mipasalig usab nga magpadala usab siya og mga hinabang sa mga nabiktima sa sunog.
Nasayran nga ang kayo nagsukad sa ikaduhang andana sa usa ka balay sa maong lugar dihang ang dinagkotang kandila natumba nga maoy misilab sa mga panapton ug papel sulod sa maong lawak. Sa wala pa ang sunog, nag-brown-out sa maong lugar nga maoy hinungdan sa pagpanagkot og kandila sa mga panimalay. (WC) BANAT NEWS