NTC mo-block sa kinawat nga cellphone

CEBU, Philippines – Gipasalig sa National Telecommunications Commission (NTC) ang pag-block sa mga cellular phone (cellphone) nga mawagtang kay gikawat kun ang tag-iya niini mo-apply og cellphone blocking o pagputol sa kinabuhi sa maong butang.

Ang maong pasalig gihimo sa tigpamaba sa NTC Allan Macaraya atol sa Association of Government Information Officers (AGIO) Forum nga gipalanog sa DYMR niadtong Martes sa buntag. Gipasabot ni Macaraya ang kamahinungdanon sa code number niini nga mao ang International Mobile Equipment Interpretation(IMEI) sanglit anhi ibase sa NTC ang ilang pag-block sa maong kahimanan.

Ang IMEI sa matag cell phone mabasa sa iyang karton    o kaha anaa sa sulod sa maong gadget. Busa mitambag si Macaraya sa matag tag-iya sa cellphone sa paglista sa maong code number aron kun mawala kini, ang IMEI maoy iyang dad-on   ngadto sa buhatan sa NTC aron mo-fill-up og blocking form.

Ang uban pang ebidensya nga angay dad-on sa tag-iya sa nawagtang nga cellphone ngadto sa buhatan sa NTC gawas sa karton niini mao ang iyang official receipt nga giluwat sa usa ka tindahan nga gipalitan niini.

Kun wala kining mga butanga ang labing katapusang butang nga angay ipresentar sa tag-iya ngadto  sa NTC mao ang usa ka apidabit nga notariyado   nga magpamatuod nga siya gayud maoy tinuod nga tag-iya sa maong butang.

Matud pa ni Macaraya nga matag karon ug unya magdasok ang mga reklamo gikan sa publiko bahin sa mangawagtang nilang cell phone. Samtang giawhag usab niya ang publiko nga maglikay sa pagpamalit og mga cellphone nga kinawat sanglit mawad-an ra kini og kapuslanan sa panahon nga kini ma-block. Gawas sa mga kinawat, gipalikayan usab ni Macaraya ang mga cellphone nga ginama sa China nga giladlad sa mga   aseras ning dakbayan.

Matud pa niya nga ang maong mga cellphone baratohon ra kaayo apan dili magdugay kay dali kaayo maguba. Midugang si Macaraya nga maglisud sila  sa pag-kontrol niining mga baligyaa kay gipalusot sa mga smuggler nga bisan ang taga Bureau of Customs maglisod sa paggukod sa mga nagpalusot niini.

Mitug-an si Macaraya nga daghan kaayong mga maayong laki sa China nga mokopya og mga gadget gikan sa orihinal nga dapatan nila og mga baratohon nga materyales. Maoy hinungdan nga barato kaayo ang presyo apan dili usab molungtad og dugay, matud pa niya. (WC) BANAT NEWS