Indian national gipusil patay

CEBU, Philippines – Patay na nga nadangat sa tambalanan ang usa ka Indian national kinsa gipusil patay sa wala hiilhing kriminal samtang nag-inom atubangan sa usa ka gasoline station sa Cebu South Coastal Road habig sa barangay Cansojong, dakbayan sa Talisay sa miaging Martes sa hapon.

Ang biktima mao si Bhupinder Singh, 36-, minyo ug nagpuyo sa barangay Lipata, Lungsod sa Minglanilla.

Si Bhupinder kinsa tigpatanto og kwarta nakaangkon og usa ka samad pinusilan sa dughan, duha sa likod ug usa sa walang kamot. Napunitan sa mga polis gikan sa lugar nga nahitaboan ang lima ka kabhang sa bala sa kalibre .45 nga pistola ug usa ka lumping na nga bala .

Si SPO1 Mikie Espina ug PO2 Stephen Sefuesca kinsa maoy miresponde sa maong insidente nagkanayon nga sa wala pa ang maong pagpamusil si Bhupinder uban sa iyang paryenteng si Avtar Singh, 24, ulitawo, taga Carmen Village, sa barangay Poblacion, Talisay nag-inom sa maong lugar nga nahitaboan dihang duha ka wala hiilhing mga lalaki nga nagsakay og Honda Wave nga motorsiklo, kolor puwa kalit lang mitungha unya ang angkas niini maoy mipusil kang Bhupinder.

Human sa maong pagpamusil ang maong mga lalaki mipasirit dayon sa ilang sakyanan pahilayo sa maong lugar.

Gihatud usab dayon sa mga nakasaksi sa maong hitabo ang biktima ngadto sa Talisay City District Hospital diin kini ideklarar nga patay na sa paghiabot didto.

Matud ni Espina nga paladman pa nila ang ilang imbestigasyon sa maong insidente tungod kay aduna silay nadawat nga report nga ang giingong nagsugo sa pagpapusil kang Bhupinder usa usab ka Indian national.

Ang mao kunong Indian national ug si Bhupinder giingong adunay personal nga bangi bahin sa negosyo.

Gibutyag ni Espina nga ang giingong Indian national napusilan na kuno kaniadto diin si Bhupinder maoy gipasanginlan. Gani si Bhupinder napasakaan og kasong frustrated murder sa korte sa maong Indian national.

Apan si Espina nagdumili sa pagbutyag sa ngalan sa maong Indian national sanglit padayon pa ang ilang imbestigasyon ug ang pamilya sa biktima wala pa usab moduso og pormal nga kaso batok sa suspetsadong utok sa maong krimen . (WC) BANAT NEWS