Konsehal Joey Daluz gikawata'g Ipod

CEBU, Philippines - Nawagtang ang usa ka bag nga gisudlan sa Ipod ug ubang mahinungdanong butang ni Konsehal Joey Daluz III human kini kiriwa sa wala hiilhing kawatan sa usa ka kan-anan sa eskina MJ Cuenco Ave. ug Legaspi Extension dakbayan sa Sugbo kagahapon sa alas 11:00 pasado sa buntag.

Matud pa ni Daluz nga nakigtagbo siya sa maong higayon ug sa maong lugar   sa pipila ka mga sakop sa technical working group sa mga proyektong inprastraktura sa dakbayan dihang kalit   lang nawagtang ang iyang bag nga diha sa iyang kilid nga   gisudlan sa iyang Ipod, check book ug mga importante nga dokumento.

Dihang ilang gisusi ang file sa CCTV camera sa maong kan-anan nasuta nila nga may usa ka tawo nga nagkawo nga   milingkod duol sa ilang lamesa ug nakita nga maoy misakiyo sa iyang bag. Matud pa niya nga gigamit sa kawatan ang tiil niini sa pagbira sa bangko nga gibutangan sa iyang bag

Nagkanayon si Daluz nga wala niya mabantayi ang maong pagpangawat sanglit busy siya sa ilang meeting. Matud pa sa konsehal nga wala’y sulod nga salapi ang iyang bag apan ang iyang Ipod nagkantidad kadto og P30,000. Nagkanayon si Daluz nga importante kaayo ang mga dokumento nga naapil og kawat busa iyang gipanghinaut nga mahibalik kini kaniya. (Sanden J. Anadia/WC) (BANAT)