Lawas sa OFW gitusak sa mga bala sa nagmotor nga kriminal

CEBU, Philippines - Natusak sa mga bala ang lawas ug ulo sa kanhi Overseas Filipino Worker (OFW) nga gipusil sa duha ka wala hiilhing kriminal nga de motor didto sa barangay Langtad siyudad sa Naga kagahapon sa alas 3:55 sa hapon. Ang biktima mao si Marny Aleasot, 29, minyo, nagpuyo sa Sitio Apache, barangay Tangke siyudad sa Naga, kinsa kanhi usa ka OFW.

Si SPO1 Arturo Andales sa Naga City Police Station mibutyag sa Banat News nga ang biktima kauban sa usa ka higala niini nga naglakaw sa sudlonong bahin sa maong lugar paingon sa highway. 

Apan kalit lang mitumaw ang duha ka kriminal nga nagsakay og motorsiklo ug ang angkas niini maoy mipauwan og bala ngadto sa biktima. Ang mga saksi nagkanayon nga nakadagan pa ang biktima ug ang kauban niini, apan kumo kay   nagsunodsunod ang buto-buto sa armas maayong pagkatusak sa mga bala ang kalawasan ug ulo niini nga maoy nakaingon sa hinanali niyang kamatayon.

Midugang ang mga saksi nga ang kauban sa biktima wala maigo kay nakasum-ok sa daghang kabalayan sa palibot.

Midugang ang mga saksi nga pagkatumba sa biktima nga duol na unta sa highway gihunongan pa kini sa kriminal ug gipauwanan gihapon sa mga bala dayong ikyas ug pahilayo gikan sa maong lugar.

Dihang gihiling sa kapolisan natusak sa mga bala ang ulo, dughan, tiyan ug uban pang bahin sa lawas lakip na ang nawong niini busa wala gyuy purohan nga mabuhi pa.

Ang kapolisan padayon pa sa ilang hot pursuit operation batok sa mga kriminal ug pagsuta sa motibo sa maong krimen. (Darrel A. Carumba/WC) (BANAT)