Sindikatong mamiktima og mga ginang mibalhin dinhi

CEBU, Philippines - Human sa ilang pagpangilad sa daghang kababayen-an   sulod sa napulo ka tuig didto sa Luzon gamit ang pangalan sa usa ka food company gipahibalo sa maong kompanya nga mibalhin na usab dinhi sa Sugbu ang maong grupo.

Ang Foodsphere Inc., ang tiggama sa CDO food products, nagkanayon nga daghan na ang mga nabiktimang kababayen-an sa Cebu, Samar ug Leyte sa modus operandi sa sindikatong gipanguluhan sa usa ka Allan Cruz Tan.    

Atol sa press conference kagahapon sa Beverly Boutique Business Hotel, ang CDO Media Affairs executive nga si Dindo Danao nagkanayon nga mao gihapon kini ang sindikato nga namiktima og kapin na usa ka gatos ka panimalay sa Luzon niadtong miaging tuig una pa sila naaresto.

“Unfortunately, the members of the syndicate returned to their modus operandi after posting bail and were recently reported to be victimizing residents of the Visayas. We ask residents in the Visayas to immediately report to the police once you are approached by this syndicate,” matud pa ni Danao.                  

Sa ilang modus operandi, ang mga miyembro sa maong sindikato magpaila isip ahente sa CDO ug mo-offer sa mga biktima nga himuong dealer.

Kun dawaton na sa biktima ang deal, mangayo ang mga suspek og downpayment para sa merchandise nga lakip sa dealership ug kung makabayad na saaran sila nga ihatud ang mga food products apan dili kini mamalik.

Ang mga gipangpuntirya sa maong sindikato mao ang mga ginang, bagitong mga negosyante ug tag-iya sa mga home-based food outlets ug food carts sa Metro Manila, Rizal, Cavite, Laguna, Pangasinan ug Ilocos ug karun naabot na gyud sila sa Visayas.

Matud pa sa mga police reports, ang sindikato gipanguluhan ni Allan Cruz Tan ug iyang mga miyembro mao sila si Leopoldo Aparece, Danilo Chan, Ramon Chan, Elmo Agarao, Erlinda Tinto, Ronald Balmores, Elvin Meries, Sergio Biares, Jhony Solis, Eddie Varono,   George Licaras, Leonel Alba Chan, Alvin Tamulak, Rextie Ramos, Aldrin Calimag ug Marilou Soriano.

Nakabiktima na sila sa siyudad sa Lapulapu og tulo ka ginang nga gipabayad og kwarta nga linibo ug gipasaligang hatagan og freezers ug mga food products aron makasugod kunohay sila pagkahimong dealer apan wala gyud mamalik ang mga suspek

“We would like to warn the public not to negotiate with these people. We wanted to clarify that we do not do the house-to-house sales program and we don’t ask for advance payments as well,” matud pa ni Danao. Kung mabiktima ug may pagduda sa mga ahenteng moduol kanila nga susama og pamaagi mahimong motawag sa Sales Department sa kompanya sa Manila ug (032) 418-1278 sa Cebu.

“Clients and interested entrepreneurs are advised to transact directly with official sales representatives of Foodsphere Inc.,” pulong pa ni Danao. (Marigold P. Lebumfacil/EIM) (BANAT)