CEBU, Philippines – Ang Social Security System (SSS) mipili og 12 ka mananaog nga employer sa annual awards program niini atol sa iyang ika-55 nga anibersaryo. Ang maong mga employer nga naglakip sa mga bangko kinsa walay puas nga mihatag og suporta alang sa kalamboan sa mga programa sa SSS pagseguro niini sa iyang minilyon ka mga miyembro.
Ang maong pasidungog nga gitawag nga Balikat ng Bayan Awards gipanghatag niadtong Huwebes didto sa kaulohan , duha ka adlaw sa wala pa sauloga sa maong ahensya ang ika- 55 nga anibersaryo niini niadtong Sabado, Septiyembre 1, 2012.
Sa maong adlaw gipahigayon ang usa ka SSS Teleconference nga gipangunahan ni Chief Executive Officer Emelio de Quiros Jr. didto sa ilang ulohang buhatan sa Manila ug sa tagsatagsa ka mga presidente ug mga opisyal niini sa matag rehiyon uban ang mga sakop sa media sa matag lugar.
Dinhi sa Sugbo didto ipahigayon ang maong kalihokan sa buhatan sa SSS sa dalan Osmeña Boulevard diin ang mga pangutana sa membro sa lokal nga media deretsong gipanubag sa mga opisyal sa SSS Manila sa maong higayon.
Uban sa tema nga "SSS, Kabuhayang Pinagsikapan, Seguridad Maaasahan", gipalanog ni De Quiros ang mahinungdanong bahin sa 2012 Balikat ng Bayan Awards uban sa pagpresentar sa Hall of Fame ngadto sa RCBC Savings Bank Inc. kinsa maoy nahimong Best Collecting Bank sa kategoriya sa mga bangko , gikan sa tuig 2009 hangtod 2011.
Gipahalipayan usab ni de Quiros ang tanang Balikat ng Bayan awardees kinsa nagpadayong misunod sa taas nga standard ug performance ingon man ang pagtuman sa mga balaod sa SSS.
Matud pa niya nga dako kaayo og papel ang ilang mga partner sa kalampusan sa ilang mga kalihokan busa naghatag kini kanila og kadasig sa paghimong mabulokon og ug makahuloganon nilang kasaulogan nining tuiga.
Ang mga awardees nakadawat og plaque sa Balikat ng Bayan nga kinulit sa bantugang sculptor nga usa ka Filipino nga si Dr. Antonio Raymundo kansang disenyo mihulagway sa mga membro ug benepisyaryo sa programa sa SSS nga may mapa sa Pilipinas nga mibanda sa hulagway sa SSS nga naghatud sa mga serbisyo ngadto sa Filipinong mamumuo.
Sumala pa ni de Quiros nga ang mga Top Employer nga mananaog alang sa tuig 2012 mao ang Metropolitan Bank and Trust Co. alang sa large account category ug ang International Chemical Industries Inc. alang sa small/medium account category.
Ang mga Best Collecting Bank awardees karong tuiga mao ang Banco de Oro Unibank Inc. (commercial), Philippine Business Bank (thrift) ug One Network Rural Bank Inc. (rural) samtang ang Best Collection partner alang sa OFW Remittances award mao ang iRemit, Inc. (WC) BANAT NEWS