CEBU, Philippines – Ang Sangguniang Kabataan Federation (SKF) dinhi sa dakbayan sa Sugbo mibahad nga dili moendorso og kandidato sa umaabot nga piniliay sa tuig 2013.
Ang maong bahad gihimo kagahapon ni John Philip Po, ang presidente sa SKF-Cebu City Chapter ug ex- officio member sa konseho sa dakbayan sa Sugbo.
Nasayran nga ang konseho sa dakbayan sa Sugbo gidominar sa mayoriyang membro niini nga pulos sakop sa Bando Osmeña Pundok Kauswagan (BOPK) nga gipangulohan ni Kongresista Tomas Osmeña.
Apan si Po sa iyang bahin miklaro nga dili siya mag-apil apil sa kasikas sa politika aron dili madaot ang imahe sa SK.
Gipamatud-an usab ni Po nga wala siya’y gidapigan nga grupo gumikan kay pulos niya giimbitar sila si Osmeña ug Mayor Michael Rama sa nagkadaiya nga kalihokan sa SK dinhi sa dakbayan.
Matud pa ni Po nga ilang ipatigbabaw ang prinsipyo sa SK sa pagka- independente kanunay aron dili masagolan og bulok sa politika ang ilang mga kalihokan.
Gani magdumili siya pag-endorsar sa iyang suod nga higala nga si kanhi SK Federation President Rengel Pelayo kinsa gikatahong modagan pagka-konsehal sa habagatang distrito sa dakbayan sa Sugbo ubos sa BOPK.
Apan matud pa ni Po nga gihatagan niya og katungod ang iyang mga sakop alang sa personal nila nga pilion nga kandidato apan dili mahimo nga moendosar sila niini.
Ang siyudad sa Sugbo gilangkoban sa 80 ka mga SK chairman ug 560 ka mga SK councilor. (WC) BANAT NEWS