Naalaang police asset gi-salvage

CEBU, Philippines – Usa ka mangingihaw ang napalgang patay na nga nagbuy-od sa yuta nga nabulit ang kalawasan og mga samad pinusilan dili layo sa buwangan sa Lower Calahoan lungsod sa Minglanilla kagahapon sa ala 1:35 sa sayong kaadlawon.

Ang biktima nailhan nga si Aldrin Nebreja, 42, molupyo sa sitio Sambagan San Isidro syudad sa Talisay, duha ka wala mailhing lalaking sakay og ‘kalabira’ nga motorsiklo ang giingong mga kriminal.

Matud ni PO3 Alfredo Pagaling sa Minglanilla Police Station dihang nahinabi sa Banat News dunay mitawag kanila nga nagpahibalong dunay tawong gipatay sa maong dapit.

Sa pag-responde sa kapulisan patay na ang biktima nga naglubog sa yuta ug na-recover sa crime scene ang duha ka kutsilyo nga gituohang iyaha sa biktima ug tulo ka kabhang sa bala sa kalibre .45 ug usa ka slug sa susamang kalibre nga gituohang gikan sa armas sa mga gikatahapan.

Ang mga residente nakadungog og butobuto sa armas nianang kaadlawon ug dihang gisusi sa mga tawo duha ka mga lalaki ang ilang nakit-ang misakay og dalidali sa motorsiklong walay bayanan (kalabira) ug kusog nga mipasirit pahilayo.

Ang hepe sa kapolisan sa syudad sa Naga, Sr. Insp. Timar Alam mibutyag sa Banat News nga sa ilang inisyal nga imbestigasyon naalaan lang ang biktima nga usa ka police asset hinungdan nga gipanimaslan kini.

“Base sa among pagsubay, naalaan daw ni nga police asset diha sa Tabunok, murag gipanimaslan ni siya sa grupo,” matud pa ni Alam sa iyang gipadalang text sa Banat News. (Lesley Caminade-Vestil/EIM) BANAT NEWS