Batan-ong kuyog sa mga GRO gipatay

CEBU, Philippines – Patay ang usa ka batan-ong lalaki nga gipusil sa duha ka wala hiilhing mga lalaki nga nag-helmet ug nagsakay og motorsiklo alas- 4 pasado ang takna sa kaadlawon sa miaging Domingo sa dalan Punta Rizal, barangay Poblacion, dakbayan sa Lapulapu.

Ang namatay giila ni PO1 Jed Querubin nga mao si Nonilon Tincong Presveteros Jr., 19, tinun-an sa high school ug nagpuyo sa maong lugar.

Matud pa ni Querubin kuyog sa biktima ang mga babayeng nagtrabaho sa usa ka videoke bar nga nanglakaw sa maong dapit dihang kalit mitumaw ang mga mamumuno nga nagmotor ug gidiretso pagpusil ang biktima.

Human niini daling mipabulhot palayo ang mga gunmen ug gibiyaan ang biktima nga dunay samad pinusilan sa nawong diha sa dalan. Ang mga sakop sa Emergency Rescue Unit Foundation (ERUF) nga miresponde midala kaniya sa Lapulapu City Hospital apan matud pang Querubin gideklarar kini sa mga doktor nga patay na pag-abot. (/EIM) BANAT NEWS