Ginikanan sa 2-anyos dili pa kadawat, hustisya ilang gipangayo

CEBU, Philippines – Gilubong na kagahapon sa hapon diha sa publikong sam-ang sa barangay Poblacion, dakbayan sa Talisay ang duha ka tuig nga batang lalaki nga gilamboslambos sa usa ka giingong adik.

Apan ang mga ginikanan naglisod gyud sa pagdawat sa gidangatan sa ilang anak nga si Jeffrey Abusejo Jr., taga barangay Biasong nga gilambos hangtud mamatay sa ilang silingang si Kienner Baller, 35, niadtong Martes sa hapon.

Si Jeffrey ang kamanghurang anak sa magtiayong Jeffrey Sr. ug Joan diin ang maguwang niining batang babaye nagpangidaron og siyete-anyos.

Kagahapon si Jeffrey Sr. nga nahinabi sa mga tigbalita mibutyag nga naglisod sila pagdawat sa nahitabo ug ilang gipangayo ang hustisya.

Sa laing bahin, usa ka 13-anyos ang mipatim-aw nga silingan sa biktima ug suspek nga mibutyag nga nakakita siya paglambos sa bata.

Matud pa niini nakit-an niya si Baller nga mihakop sa duha ka tiil sa biktima dayon giisa sa ibabaw ug giugbok-ugbok nga daw nagbayo diha sa karsada ug pagkahuman gihapos ngadto sa usa ka itom nga sakyanan daplin sa karsada dayon gikitkit ang liog unya giitsa.

Sumala pa sa 13-anyos wala dayon siya makalihok tungod sa kahadlok sa nasaksihan apan midagan siya ug nagpakitabang sa mga silingan ug sa inahan sa bata.

Apan dihang miabot ang inahan sa bata aron unta puniton ang anak gikuptan kini sa suspek ug gitukmod.

Ang mga tanod sa barangay Biasong nga mihatud sa lubong nga nahinabi sa mga tigbalita mihulagway nga ang suspetsado dili bayolente sa ilang lugar ug nakugang na lang sila sa maong hitabo. (EIM) BANAT NEWS