Girapido duha patay

CEBU, Philippines – Duha ang patay samtang laing duha usab ang nasamdan sa nahitabong pagpangrakrak sa barangay Victoria lungsod sa San Remegio pasado alas-8 sa miaging gabii.

Ang mga namatay mao silang Teodoro Remando, 33, ug Rolando dela Cruz, 49, samtang nangaangol ang paryente ni Remando nga 17-anyos ug Selade Marianito, 32, kapuyo ni dela Cruz.

Ang mamumuno giingong nagsuot og helmet nga itom, nag-jacket og itom ug nag-itom og karsones ug nagpailang trabahante sa usa ka freight service.

Sa pakighinabi sa Banat News ni PO3 Felipe Mandal, sa San Remegio Police natulog si Remando sa ilang balay samtang sila si dela Cruz ug Marianito uban sa 17-anyos nanan-aw og telebisyon diha sa silong sa balay.

Nahibulong na lang sila nga gabii nang dako ug dihay lalaking miabot sa ilang balay nga nagpailang nagtrabaho sa usa ka freight service nga nangita kang Remando.

Si Remando gitawag nilang dela Cruz maong mikanaog kini gikan sa taas apan pagkakita sa mamumuno sa gipangita girakrakan dayon niini kini sa gikuptang armas.

Human niini daling miikyas ang kriminal, giingong misakay kini og motorsiklo.

Si Remando nakaangkon og tulo ka samad pinusilan sa iyang lawas samtang si dela Cruz nakaangkon usab og samad pinusilan sa likod nga bahin sa iyang ulo samtang si Marianito napusilan sa tuong tuhod.

Ang 17-anyos nga kabanay ni Remando nga nagtan-aw lang og telebisyon naigo usab sa nawong, liog, ug tuong bukton.

Sa pakighinabi sa Banat News ni Insp. Anecito Manluluyo ang hepe sa kapolisan sa lungsod sa San Remegio misaysay kini nga wala pa silay nakitang motibo sa pagpamusil tungod kay sa ilang pakisusi sa background sa Remando wala man kini criminal records bisan sa barangay. Nagduda hinuon silang posibleng dunay nasuko kang Remando nga karon ilaha nang gisubay.

Nakuha sa crime scene mao ang lima ka kabhang sa kalibre .45 ug duha ka buhing bala sa susama gihapon nga armas. (/EIM) BANAT NEWS